कोरोना कू कहर जारी, पिछला 7 दिन मा 811 लोखुं मौत
दुनिया भर मा कोरोना अब विकराल रूप मा च. एक तरफ अमेरिका मा राष्ट्रपति डोनाल्ड ट्रम्प कू सैन्य सहायक कोरोना संक्रमित ह्व़े गी, जेका बाद अब रोज होली ट्रम्पे कोरोना जांच. दूसरी तरफ देश मा भी कोरोना कू खतरा लगातार बडणु च. कोरोना का अब तक 56342 केस ए गिन. त मन्न वलो की संख्या पोंछी 1886. मई मेहना का 7 दिन मा ही 811 लोखुं मौत ह्व़े गी.
शराब बिक्री पर रोक वलि याचिका सुप्रीम कोर्ट न करी ख़ारिज
सुप्रीम कोर्ट न कोरोना वायरसे रोकथाम खुंण लागू लॉकडाउन का बीच शराबे बिक्री पर स्पष्टता और दुकानों पर सोशल डिस्टेंसिंग वली याचिका करी खारिज.
भारतीय वायुसेना कू मिग- 29 विमान दुर्घटनाग्रस्त
आज पंजाब मा भारतीय वायुसेना कू एक लड़ाकू विमान मिग-29 दुर्घटनाग्रस्त ह्व़े गी. हालांकि, विमान मा बेठ्यु पायलट सुरक्षित च.
औरंगाबाद मा मालगाड़ी न 16 मजदूरों के कुचली
आज सुबेर 5:15 बजि औरंगाबाद मा बडू हादसा ह्व़े. मध्य प्रदेश जाण वला 16 मजदूरों ते एक मालगाड़ी न कुचली. सभी लोखुं की मौका पर मौत. रेलवे न मामला मा जांचक आदेश दे. उधर, महाराष्ट्र सरकार न मोन्न वला लोखुं का घोरवलूं ते 5-5 लाखे मदद कू एलान करी.
कैलाश मानसरोवर ते लिंक रोड कू उद्घाटन
आज केंद्रीय रक्षा मंत्री राजनाथ सिंह न वीडियो कॉन्फ्रेंसिंग का जरिया कैलाश मानसरोवर ते लिंक रोड कू उद्घाटन करी. इं मौका पर चीफ ऑफ डिफेंस स्टाफ जनरल बिपिन रावत और थल सेनाध्यक्ष जनरल मनोज मुकुंद नरवाने भी उपस्थित छा.
गढ़वाल मंडल विकास निगम न डॉक्टरों ते भेजी 4 लाखों बिल
ऋषिकेश का मुनि की रेती मा गढ़वाल मंडल विकास निगम न एक रिसॉर्ट मा रुक्यां 70 डॉक्टरों और स्वास्थ्यकर्मियों ते भेजी 4 लाखो बिल. उधर, डॉक्टरों का मुताबिक, उन वख खानों ही नि खे.
अभिभावकों ते परेशान कन्न वला एक स्कूल का खिलाफ मुकदमा
लॉकडाउन शासनादेश का उल्लंघन मा देहरादून का शिवालिक इंटरनेशनल स्कूल प्रबन्धक का खिलाफ मुकदमा. स्कूल प्रबन्धक पर आरोप च कि शासनादेश का बावजूद उन अभिभावकों ते फीस खुंण परेशान करी छो.
ई-पास बनोनो परेशान हव्या लोग, सोशल डिस्टेंसिंग कू भी उल्लंघन
हल्द्वानी मा ई-पास बनोनो लोखुं ते होणी च भारी परेशानी. सुबेर 5 बजि लोग बाग़ लाइन लगोनो मजबूर छिन. इं दौरान सोशल डिस्टेंसिंग कू भी उल्लघंन होणु च.
एचएनबी विवि मा आन्दोलन पर छात्र, पत्रकारों की नो एंट्री
हेमवती नंदन बहुगुणा गढ़वाल केंद्रीय विश्वविद्यालय मा बिता 5 दिन बटी छात्र विवि का खिलाफ आन्दोलन पर छिन. उनकी मांग च कि ऑनलाइन परीक्षा तारीख अग्ने हो. इं दौरान विवि न आन्दोलन कवर खुंण मीडिया पर लगे रोक.
एनआईटी की ऑनलाइन परीक्षा 14 मई बटी शुरू
कोरोना महामारी का कारण कई परीक्षा स्थगित ह्व़े गिन. लेकिन अब उत्तराखंड एनआईटी न अपना 893 छात्रों की परीक्षे तारिख कू एलान करी. परीक्षा 14 मई बटी 22 मई तक करे जाली.
