मामटी गलादां: हमाचल च लैक्शनां दा रौला मुकी गया. इना लेक्शना ते जनता दा भी खैड़ा छुट्टया कन्ने नेतायां दा भी. जनता जो उम्मीद है कि हुण 68 के 68 बंदे लेक्शना दा खैड़ा छड़ी ने साड़े बारे च भी सोचगे. फरवरी च राज्यसभा चुनावां ते शुरू होई खोदल हुण मुकगी ऐ ता ऊपरे आला जाणे. पर इक गल साफ होई जाणी कि जे तीनों सीटां कांग्रेस जीती गई ता सुक्खू पाईए (सीएम सुक्खविंदर सिंह सुक्खू, सुक्खू पाई शब्द सिर्फ सटायर के लिए इस्तेमाल किया गया है इसे अन्यथा न लें) दी कुर्सिया जो पक्का समींट लगी जाणा. जे हारी गए तां बीजेपी आलेयां जीणे नी देणा कन्ने राती सुपने च कुर्सी रूड़दी दुसी सकदी, भुख, नींद्र उड़ी सकदी. जे बीजेपी हारी ता फूला दी पंखड़ियां तार तार होई जाणी. कांग्रेस आलेया बुड़क मारदे बोलणा ऐ ता बोला दे थे सरकार नी बचदी.
चला खैर लेक्शना दा रौला रप्पा मुकी गया. मामटी जो पूछणा लगे भाणजे कुण जीतगा हमीरपुर कन्ने देहरे ते. मामटी लगया बोलणा पैई इस बार वोटिंग पर्सेंटेज बड़ी कम रेई 2017 कन्ने 2012 च इना तीनां सीटां पर वोटिंग ज्यादा होई थी. पर इबकी बार लगादा पैई लोकां च इना लैक्शना दा करंट घट था. देहरे आले कने मिरपुर आले ता जम्मे ई सुत्ते रेई गए. शायद तिन्ना जो पता ही नी आज वोट पाणा जाणा. वोटिंग ई 65 पर्सेंट होई. भणजेयां पुछया मामी कै नी गई वोट पाणा कल.
मामटी थोड़ी देर रुकी ने बोलया कि मामी बोलदा थी कि मैं वोटां पाणा कन्ने रैलिया च दौड़ी रहूं. घरे डंगरेयां जो घा पाणी कूस पाणा. ईंया भी सरकारां साड़ी सुणदी कुत्तू. मुंडू चार सालां ते टेस्टां दी तैयारी करा दा. बोलदा आली वकैंसी नी आई, कदी पेपर लीक होई जादा. कालू ओणी वकैंसी. लेक्शन ता फटाफटियां आई जादे कन्ने वोटां मंगणा वी. छोकरुआं दी जवानी तैयारिया च निकली जांदी. 1500-1500 दा रौला पैया पिछली बारी. बादे च बोलया सारेयां जो नी मिलणे. मैं फार्म भरया दौड़ी-दौड़ी ने. हुण तिस फार्मे पर पता नी दफ्तरे च कुण बाबू टेबले पर बैठी नै समोसा खा दा होणा. मैं बोलया तिजो 1500 दी चिंता ओआ दी. मैं एचआरटीसी ते लटैर (रिटायर) मिंजो ना मिला दी पेंशन ना एरियल (एरियर) मिंजो होआ दी टेंशन. सरकार बोला दी खजाना खाली ऐ. ता खजाना खाली किता कुणु. इतना बोलदे बोलदे पड़ोसी बाईका पर चिकड़े ने मंडोई ने आई गया मैं पूछया ये क्या होया बोलया वोट पाणा गया था रस्ते च सड़क च खड्डा था दूसया नी कन्ने बजारे च रिड़की पैया, पता नी कैं सरकार जो ये सड़का नी दुसा दियां. मैं बोलया ईबे सुक्खू पाई गलाई गये बोलया मेरिया मैड़मा जो जताई देया मैं तुहाड़े सारे कम करी देणे. बोलया विधायक कन्ने देहरे जो सीएम भी मिलणा.
बीचे ते इक बोली पया से ता ठीक आ पर नालागढ़ दा क्या होंगा? मामटी लगया बोलणा नालागढ़ फिरी ठीक था. उत्थी लोकां ठीक ठाक वोट पाए. भाणजे लगे पूछणा सै ता ठीक आ पर वोटिंग प्रसेंटज घटी गई मतलब सरकार ते लोग नराज अन? मामटी हुक्के दी गुड़गुड़ी खिंजणे ते बाद बोलया, हमाचल च वोट हमाचल च 4 ते 5 प्रसेंट वोट ऊपर नीचे होणे दा मतलब रजल्ट चौकान्ने आला होई सकदा. पर वोट प्रसेंट देखी नी कोई स्टीक रजल्ट नी कड़ी सकदा.
| विधानसभा सीट | उपचुनाव में कुल मतदान प्रतिशत |
| नालागढ़ | 78.82 |
| हमीरपुर | 65.78 |
| देहरा | 65.42 |
भाणजेयां पूछया मामटी जीतगा कूण?
इस सवाला पर मामटी सोचदा रहया फिररी बोलया थोड़ी देरा बाद बोलया मिरपर कन्ने नालागढ़ च कांग्रेस आलेया 2022 च हारने आले कैंडिडेटां दा पल्ला पकड़या. देहरे च सुक्खू पाइए दी लाड़ी लेक्शन लड़ा दी थी. देहरे च एड़ा लगया कि सुक्खू पाई लेक्शन लड़ा दे. तिनां दा ध्यान भी उस पासे ज्यादा था. उथी सीएम दा फैक्टर काम करी सकदा. दूजी गल देहरे कन्ने हमीरपुर च कमल दे फुलां दी पुराणी कन्ने जेड़ी नोई नोई पंखुड़ियां (बीजेपी में शामिल होने वाले पूर्व विधायक) बीजेपी दे बागे च खिलियां तिनां च अप्पणी खौदल पैई थी. पराणे (पुराने कार्यकर्ता) लगे बोलणा ऐ नोयां बंदेया पीछे अहें खुडे लैण लाई ते आंहे जे मां बोली पार्टियां दी इतने साल दिन रात सेवा कीति आहां जो ऐ इनाम मिलया. देहरे च ध्वाले दी ज्वाला शांत नी होई पूरे लेक्शनां च बोलया मौका आणे पर मैं रगड़ने सारे एक एक करी ने. छड़ेण मैं भी नीं. हमीपुर च नरेंद्र ठाकुर अलग रुसया था. हमीरपुर देहरे च बीजेपी दे कमला दी कलियां (बीजेपी कार्यकर्ता) कट्ठी नी होई कोई मुरझाई थी कोई बस ऊपरे उपरे ते खिलणे दा नाटक करा दी थी. बीजेपी आले दे सिर खरे बजके अप्पी च इस बरिया. ये थोड़ा बीजेपी जो नुकसान देई सकदी. कांग्रेस सारी अपने कमांडर दे हुक्मा पर लैफ्ट-राइट करदी नजर आई. जीतगा कुण ऐ ता 13 जुलाई जो पता चलगा. कुसद दे जी बस होणी. जे ये तीनों निर्दलीय हारेगे तो लोकां बोलणा बीजेपी आलेया पहले चार अग्निवीर वाणाए थे तीन होर बणाई ते. पर अग्निवीर जो पेंशन नी लगदी, इनां जो लगी जाणा.
मामटी फिर हुक्का लगी प्या पीणा इतना बोलणे ते बाद. कने भाणजे लगी पै रोला पाणा जे कांग्रेस जीती गई ते ऐ होणा, बीजेपी जीती ता ऐ होणा. सारेयां रौला सुणी ने मामटी लगया बोलणा मेरी भी सुणगे की नी कि अपणी अपणी पकाई जांगे. मामटी बोलया हमीरपुर कन्ने देहरे दी सीट सुक्खू पाइए दी इज्जत दा सवाल है. ओथी हारे तां दिने ही नेरा होई जाणा. हमीरपुर सीएम दा जिला है कन्ने बड़सर पैले ही हारी गयो. ये तां ऐड़ा दाग होणा जेड़ा सर्फ एक्सल ने भी धुली सकदा.
भणजे लगे बोलणा जे बीजेपी आले हारी गे तीनां सीटां?
मामटी मजाका च लगया बोलणा ता जेड़े ऐ पराणे बंदे खुडे लैण लायो इन्ना बोलणा जोइया मामा मनदा नी पुराणे बंदेया दी सुणदा नी. जयराम ठाकर दे चेहरे पर 2022 च लैक्शन हारे. राज्यसभा दे लेक्शना दे टैमां पर गलाया था कि ये सरकार नी बचदी. पर सरकार बची गेई चार सीटां पहले हारी गइयां. तीन हुण हारियां ता पॉलिटिक्ल इमेज थोड़ी घटी सकदी. कांग्रेसियां दे ताने मेणे मिलणे से लग. कांग्रेसी पैले बोला दे बोलया नेता विपक्षे दा कोट सीतया सया रेई जाणा. आखिर च ताऊ लगया गलाणा दिखा हुण 13 जो क्या होंदा कुण छांदा कन्ने कुण बिच्छदा. इतनी देरा च मामटिए पीछे खड़ोतया भाणजा बोलया आरो मामटी वोट नेतायां लैणे कने, तिसते बाद जनता बजणे छैणे.
नोट: ये लेख व्यंग के तौर पर लिखा गया है. इसमें किसी भी व्यक्ति विशेष पर व्यक्तिगत टिप्पणी नहीं की गई है.
