વલસાડ: કપરાડામાં કાર્યક્રમના શુભારંભ આદિવાસીઓના કૂળદેવી અને દેવીદેવતાઓને પુષ્પ અર્પણ સાથે દીપપ્રાગટય થકી કરવામાં આવ્યો હતો. આ અવસરે રાજયના મુખ્યપ્રધાન વિજય રૂપાણીએ ઓનલાઇન સંબોધન કરી આંતરાષ્ટ્રીય આદિવાસી દિવસની શુભેચ્છાઓ પાઠવી હતી.
આ અવસરે પ્રધાન ઇશ્વરસિંહ પટેલે જણાવ્યું હતુ કે, આદિવાસીઓને ભૌતિક સુવિધા રાજય સરકારે પુરી પાડી છે. આદિવાસીઓના સર્વાંગી વિકાસ માટે તત્કાલીન મુખ્યપ્રધાન અને હાલના દેશના વડાપ્રધાન નરેન્દ્રભાઇ મોદીએ વનબંધુ યોજના અમલમાં મુકી રસ્તા, પાણી, વીજળી, આરોગ્ય જેવી અનેક સુવિધાઓ પુરી પાડી છે. શૈક્ષણિક ક્ષેત્રે પણ અનેક સવલતો આપી છે. પેસા એકટનો કાયદો રાજયના મુખ્યપ્રધાન વિજય રૂપાણી દ્વારા અમલવારી કરાવી આદિવાસીઓના હક્કો આપવાનું કાર્ય કર્યુ છે. વન અધિકાર ધારા હેઠળ જંગલની જમીન ખેડતા આદિવાસીઓને જમીન પણ ફાળવી છે.
પારડીના ધારાસભ્ય કનુભાઇ દેસાઇ અને પૂર્વ ધારાસભ્ય જીતુભાઇ ચૌધરીએ પ્રાસંગિક ઉદબોધનમાં આંતરરાષ્ટ્રીય આદિવાસી દિવસની શુભકામના પાઠવી હતી. આ અવસરે એસ.એસ.સી/ એચ.એસ.સીમાં પ્રથમ આવનાર વિદ્યાર્થીનીઓ, ખેલાડીઓ, પ્રગતિશીલ ખેડૂતો, દુધ ઉત્પાદકોનું સન્માન અને ગારમેન્ટ તાલીમના લાભાર્થીઓ તેમજ વન અધિકાર અધિનિયમ-2006 અન્વયે અધિકારપત્રો આપવામાં આવ્યા હતા.
આ અવસરે આદિજાતિઓના વિકાસ યોજના અંગેની ઝાંખી દર્શાવતી સી.ડી.નું નિદર્શન કરાયું હતું. કાર્યક્રમના અંતે મહાનુભાવોના હસ્તે શાળાના પટાંગણમાં વૃક્ષારોપણ કરવામાં આવ્યું હતું.
આ અવસરે જિલ્લા પંચાયત આરોગ્ય સમિતિના અધ્યક્ષ ગુલાબભાઇ રાઉત, કપરાડા તાલુકા પંચાયત પ્રમુખ સુમિત્રાબેન નાયબ વન સંરક્ષક એચ.એસ.પટેલ, પ્રાંત અધિકારી વી.સી.બાગુલ, મામલતદાર કે.એસ. સુવેરા સહિત જિલ્લા તાલુકા પંચાયત સદસ્યો, આદિવાસી અગ્રણીઓ, કપરાડા તાલુકાના અંતરિયાળ વિસ્તારના આદિવાસી ભાઇ-બહેનો હાજર રહ્યા હતા.
