ભાઈ બહેનના પવિત્ર પર્વ રક્ષાબંધનને લઈને પોતાના ભાઈને ત્યાં રાખડી બાંધવા માટે વડોદરા પહોંચેલી વલસાડના એક ગામની શિક્ષિકા રાખડી બાંધીને વલસાડ ગુજરાત ક્વીન ટ્રેનમાં પરત ફરી રહી હતી. આ દરમિયાન નવસારી સ્ટેશન ઉપરથી લેડીસ કોચમાં એક હિન્દીભાષી યુવાન આ મહિલાની એકલતાનો લાભ લઈને ચડ્યો હતો અને જેવી ટ્રેન શરૂ થઈ કે આ મહિલાનો મોઢું દબાવી તેની સાથે દુષ્કર્મનો પ્રયાસ કર્યો હતો. પરંતુ આ શિક્ષિકા મહિલા તેને તાબે થઇ ન હતી. જોકે બાદમાં અમલસાડ સ્ટેશન આવી જતા જેમ તેમ કરીને શિક્ષિકા મહિલા આ હવસખોર યુવાનની ચુંગાલમાંથી બહાર નીકળી પાછળની બાજુએ આવેલા એક જનરલ કોચમાં જઈને બેસી ગઈ હતી. જ્યારે પેલો યુવાન ટ્રેનમાંથી ઉતરીને ફરાર થઈ ગયો હતો. આ સમગ્ર ઘટનાની ફરિયાદ આ શિક્ષિકાએ વલસાડ રેલવે પોલીસમાં કરતા પોલીસે ફરિયાદ નોંધી તપાસ શરૂ કરી છે.
જોકે સુરત બાદ વલસાડ સુધીના કોઇપણ સ્ટેશન ઉપર CCTV કેમેરા ન હોવાથી પોલીસ માટે આ યુવાનને શોધવાનું હાલ લોઢાના ચણા ચાવવા બરાબર બન્યું છે. તેમ છતાં પણ રેલવે પોલીસે ફરિયાદીના વર્ણનના આધારે એક સ્કેચ તૈયાર કર્યો છે અને આ સ્કેચ સુરત થી વલસાડ સુધીના તમામ સ્ટેશનના તેમના બાતમીદારોને મોકલી દીધો છે. જેને લઇને હવે આ દુષ્કર્મનો પ્રયાસ કરનાર હવસખોરને જલદી ઝડપી કડક કાર્યવાહી હાથ ધરવામાં આવશે.
અત્રે નોંધનીય છે કે વડોદરાથી સાંજે પાંચ વાગ્યે ઉપડીને રાત્રે સાડા બાર કલાકે વલસાડ સ્ટેશને પહોંચી ગુજરાત નવસારી સ્ટેશન ગયા બાદ દરેક કોચમાં એકલદોકલ લોકો જ રહેતા હોય છે. અને એમાં પણ મહિલા કોચમાં આ યુવાન ચડયો કેવી રીતે એ એક તપાસનો વિષય છે. વળી રાત્રિ દરમિયાન રેલવે પોલીસ કે આર.પી.એફ દ્વારા આ ગુજરાત ક્વીનમાં ચેકિંગ પણ કરવામાં આવતું નથી. જેના કારણે આવી ઘટનાઓ દિન-પ્રતિદિન વધતી જાય છે. જેમાં કેટલીક જાગૃત મહિલાઓ ફરિયાદ કરવા આવે છે તો કેટલીક મહિલાઓ સમાજમાં પોતાની બદનામી થવાના ડરને કારણે ફરિયાદ કરતા પણ અચકાતી હોય છે ત્યારે આવી ઘટનાઓ રોકવા પોલીસ સતર્ક બને એ જરૂરી છે.
