વલસાડમાં શેરડીના ખેતરમાં પાણી વાળવા ગયેલા વૃદ્ધનું કરંટ લાગતા મોત

વલસાડ: પારડી તાલુકાના અરનાલા ગામે શેરડીના ખેતરમાં પાણી વાળવા ગયેલા 70 વર્ષીય વૃદ્ધને વીજપોલ નજીક વીજ કરંટ લાગતા ઘટનાસ્થળે જ વૃદ્ધનું કરુણ મોત થયું હતું. જેને પગલે સ્થાનિકોમાં વિજકંપનીની બેદરકારી બાબતે રોષ જોવા મળ્યો હતો.

પારડી તાલુકાના અરનાલા ગામે પારસી ફળિયામાં રહેતા રમણભાઈ પટેલ ઉ.વ 70 જેઓ બપોરે 3 વાગ્યે ની આસપાસમાં નહેર નજીકમાં આવેલ તેમના શેરડીના ખેતરમાં પાણી વાળવા ગયા હતા. જેમાં ખેતરની વચ્ચે મુકવામાં આવેલ ઇલક્ટ્રિકના પોલ ઉપરથી અર્થીગ તાર સાથે કરંટ ખેતરમાં ઉતરી રહ્યો હોય. રમણભાઈ પાણીમાં હતા અને અચાનક ખેતરમાં ઉતરતા જોરદાર ઝટકો લાગતા તેઓનું સ્થળ પર જ મોત થયું હતું. સમગ્ર ઘટના અંગે જાણકારી મળતા સ્થાનિકો એકત્ર થઈ ગયા હતા અને વીજ કંપનીમાં કર્મચારી કે આધિકારીને સ્થળ ઉપર બોલાવવા માટેની જીદ પકડી હતી કે જેથી તેમની બેદરકારી સ્થળ ઉપર દેખાડી શકાય

આ અંગે ઘટનાની જાણકારી પારડી પોલીસને થતાં પોલીસ પણ સ્થળ ઉપર પહોંચી હતી ત્યાં સ્થાનિકોએ જણાવ્યું કે, ખેતરમાં મુકવામાં આવેલ પોલ ઉપર વાયર સાથે જે ચીનાઈ માટી નું સેકલ વીજ કંપની દ્વારા લગાવવામાં ન આવતા વાયરમાં કટ પડી જતા સીધો કરંટ જમીન માં ઉતરતો હતો જેને લીધે જ તે વૃદ્ધને જીવ ગુમાવવાનો વારો આવ્યો હતો.