વલસાડઃ પારડી તાલુકાના વેલપરવા ગામે ભેંસુ ફળીયામાં વહેલી પરોઢિયે આવી ચડેલા દીપડાએ આંબાના ઝાડ ઉપર રાત્રિ દરમિયાન ડાળી ઉપર બેસેલી મરઘીને જોતા તેમને છલાંગ મારી શિકાર માટે પોતાનું મન બનાવ્યું હતું. ચાર વાગ્યે બનેલી આ ઘટનાને પગલે મરઘીઓમાં કોલાહલને પગલે ઘરના ઓટલે સુતેલા કેટલાક લોકો જાગી ગયા હતા. જો કે વરસાદને પગલે સમગ્ર રાત્રી દરમિયાન લાઇટ ન હોવાને લઈને અંધકાર હતો. જેને પગલે લોકોને પ્રથમ તો એવું લાગ્યું કે કોઈ શ્વાન દ્વારા હુમલો કરાયો હશે. પરંતુ બાદમાં જ્યારે બેટરી લાઈટ સામે પાડતા તેમની નજરમાં કદાવર દીપડો જતા દેખાયો હતો, જેને પગલે લોકોમાં ખૂબ ભયનો માહોલ ફેલાયો છે.
ભેંસુ ફળિયાના સ્થાનિક લોકોએ જણાવ્યું કે, આ અગાઉ પણ તેમના આસપાસના ફળિયામાં દીપડાએ અનેક મારણ કર્યા છે. જેથી તેઓને ડર છે. તેમના ઘર આંગણા સુધી પહોંચેલો દીપડો આગામી સમયમાં તેમના પર પણ હુમલો પણ કરી શકે તેમ છે, જેને લઇને લોકો રાત્રી દરમિયાન ઘરની બહાર પણ નીકળી શકતા નથી.
આ ઘટના બાદ જ્યારે વહેલી સવારે લોકો સુમિત્રાબેનના ઘરે જોવા આવ્યા ત્યારે દીપડાના પંજા જમીન પર પડેલા જોવા મળ્યા છે અને જેને પગલે આ સમગ્ર બાબત ફલિત થઈ શકે કે દીપડો પાંચ મરઘીનો મારણ કરીને જતો રહ્યો છે.
નોંધનીય છે કે, આ સમગ્ર બાબતે સ્થાનિક લોકોએ ગામના સરપંચને જાણ કરી છે, જે બાદ જંગલખાતાને સમગ્ર બાબતથી માહિતગાર કરાશે અને દીપડાને પકડવા માટે ગામના કેટલાક વિસ્તારમાં પાંજરું પણ મૂકવામાં આવે એવા ચક્રો ગતિમાન બન્યા છે
