પારડીના ઉમરસાડીની એક ઈન્ડસ્ટ્રીમાં હૈદરાબાદથી મટીરીયલ લઈ માલ સામાન ખાલી કરવા કન્ટેનરો આવતા રહે છે. જેમાનું માલ સામાન ખાલી કરીને પરત ફરી રહ્યો હતો. ત્યારે ઉમરસાડી રોડ ઉપર એસબીઆઇ બેન્કની સામે કન્ટેનર ઉભુ રાખી ટ્રક ચાલક એટીએમમાં પૈસા ઉપાડવા ગયો હતો.
આ સમયે ટ્રક ઉપરથી પસાર થઈ રહેલા ઈલેક્ટ્રીકના તાર અડકી જતાં કન્ટેનર પર તણખા ઝરવાને કારણે કન્ટેનરની ઉપર ઢાકવામાં આવેલી તાડપત્રી આગમાં લપેટાઇ ગઇ હતી. આગના કારણે ટાયરમાં પણ આગ લીગી હતી. જોત જોતામાં આગ વધુ પ્રસરી હતી. જો કે, સ્થાનિકોએ તકેદારી રાખતા ફાયર બ્રિગેડને જાણ કરવામાં આવી હતી. જે બાદ પારડી નગરપાલિકાના ફાયરફાઈટરનો કાફલો સ્થળ પર પહોંચીને આગ પર કાબૂ મેળવ્યો હતો. આ સમગ્ર ઘટનામાં કોઈ જાનહાનિ થઈ ન હતી, પરંતુ આગ લાગવાથી લોકોમાં ભયનો માહોલ જોવા મળ્યો હતો.
ઉલ્લેખનીય છે કે, ઉમરસાડી માછીવાડ તરફ જતા માર્ગ પર સ્ટેટ બેંક નજીક કેટલાક ઇલેક્ટ્રિકના તારો ખૂબ જ જોખમી રીતે જમીનથી ખૂબ નજીક છે. જે કારણે આગામી દિવસમાં કોઈ મોટી ઘટના બનવાની શક્યકતા છે. જો તેને યોગ્ય રીતે ઊંચાઇ ઉપર ગોઠવણ નહીં કરવામાં આવે તો આ તારા નક્કી કોઈનો ભોગ લેશે.
