કોરોના ઇફેક્ટઃ ઘરે-ઘરે સિલિન્ડર પહોંચાડતા ગેસ કંપનીના કર્મચારીઓને આર્થિક સહાયની માગ

વિશ્વમાં કોરોનાના કહેર દરમિયાન પેટ્રોલ ડીઝલની માંગ ઘટી છે અને ઘરેલુ ગેસની માંગ વધી છે. ત્યારે દરરોજ હજારો લોકોને મળતા અને ઘરે-ઘરે સિલિન્ડર પહોંચાડતા ગેસ એજન્સીના કર્મચારીઓએ પણ સરકાર પાસે આર્થિક સહાયની અને આરોગ્ય તપાસણીની માંગ કરી છે.

વાપીઃ કોરોનાના 21 દિવસના લોકડાઉનમાં લોકો ઘરમાં જ રહેવા મજબૂર બન્યા છે. ત્યારે, પોલીસ, ડોકટર અને પેરામેડીકલ સ્ટાફની જેમ ગેસ એજન્સીના કામદારો હાલ ઘરઘર સિલિન્ડર પહોંચાડવાની પોતાની ફરજ નિભાવી રહ્યા છે. ત્યારે કોરોના મહામારીનો ચેપ જો તમને લાગે તો તે બાદ તેમનો પરિવાર મુશ્કેલીમાં મૂકાઈ શકે છે. આ દહેશતને ધ્યાનમાં રાખીને વિવિધ ગેસ એજન્સીઓમાં કામ કરતાં કર્મચારીઓએ પણ સરકાર પાસે માંગ કરી છે કે, જે રીતે સરકારે આરોગ્ય વિભાગના કર્મચારીઓ માટે આર્થિક પેકેજ જાહેર કર્યું છે. તેવી આર્થિક સહાય તેમને પણ આપવામાં આવે.

ગેસ કંપનીના કર્મચારીઓની આર્થિક સહાય આપવાની માંગ

આ અંગે વાપીમાં HP ગેસ એજન્સીમાં કામ કરતા કમલેશ નામના યુવાન સાથે વાત કરતા તેમણે જણાવ્યું હતું કે, તે ગેસ એજન્સીમાં છેલ્લા દસ વર્ષથી કામ કરે છે. પોતે અને પોતાના સાથી કર્મચારીઓ કોરોનાની મહામારી વચ્ચે પણ રોજના ગેસના ગ્રાહકોને ગેસ સિલિન્ડર પહોંચાડી રહ્યા છે. જેમાં તે લોકો રોજના 1000 જેટલા લોકોને મળે છે. ત્યારે કોરોના ચેપથી બચવા માટે હાલ તેમને માસ્ક અને હાથ મોજા જેવી સામાન્ય સગવડ પૂરી પાડવામાં આવી છે.પરંતુ આરોગ્ય વિભાગ દ્વારા તેમનું હેલ્થ ચેકઅપ થતું નથી. તેમના આરોગ્યની સુરક્ષા જાળવવામાં આવતી નથી. સરકાર દ્વારા તેમના આરોગ્યનું ચેક અપ થાય, જે રીતે ડોક્ટર નર્સ અને અન્ય સરકારી કર્મચારીઓ માટે સરકારે આર્થિક વીમા પેકેજ જાહેર કર્યું છે. તેવી આર્થિક સહાય તેમને પૂરી પાડવામાં આવે.કમલેશનું માનવું છે કે, ડોક્ટર અને અન્ય સરકારી કર્મચારીઓ હોસ્પિટલ કે અન્ય અમુક સ્થળો પૂરતા મર્યાદિત વિસ્તારમાં જ રહે છે. જ્યારે એક ગેસ એજન્સીના કર્મચારીએ ગેસ સિલેન્ડરની ડિલીવરી માટે આખા શહેરમાં ફરવું પડે છે. ત્યારે કોરોનાનો ચેપ તેમને જલ્દી લાગવાના ચાન્સીસ વધુ છે. જે જોતા સરકારે તેમને અને તેમના પરિવાર માટે પણ મદદરૂપ થતી સહાય પૂરી પાડવી જોઈએ.ઉલ્લેખનીય છે કે, વાપીમાં અને સમગ્ર વલસાડ જિલ્લામાં ગેસ એજન્સીના એવા અનેક કર્મચારીઓ છે. જે દરરોજ ટેમ્પોમાં કે અન્ય વાહનોમાં લોકોના ઘરે ઘરે જઈને ગેસ સિલિન્ડર પહોંચાડી રહ્યા છે. lockdown નો સમય હોય ગેસ સિલિન્ડરની માંગ પણ ખુબ વધી છે. ત્યારે આશા રાખીએ કે સરકાર આ ગેસ કર્મચારીઓની માંગને પણ ધ્યાનમાં લે.