વલસાડઃ કપરાડા તાલુકાના બાબરખડક ગામે સર્વે નંબર 518 વાળી જગ્યા જેમાં માલિક નાઝીર અલ્લાહ રખ્ખા દ્વારા તેની જમીનમાં ખાડો હોવાને લઈ તેનું પૂરણ કામ કરવા માટે કોઈ સાજીદ નામના ઈસમનો સંપર્ક કરીને, તેનું પૂરણ કામ શરૂ કર્યું હતું. આ જગ્યાએ માટી નાખવાના બદલે સાજીદ દ્વારા કાળા રંગનું કેમિકલ કેટલા પ્લાસ્ટિકના થેલામાં ભરીને અહીં રાખવામાં આવી રહ્યું હતું.
આ અંગેની જાણકારી સ્થાનિકોએ ગુજરાત પોલ્યુશન કંટ્રોલ બોર્ડમાં કરી હતી. જે બાદ GPCBનાં અધિકારીઓ સ્થળ પર આવી કેટલાક સેમ્પલ મેળવ્યા હતા. પર્યાવરણને નુકસાન અને હાનિ થાય તેવા પ્રકારનું કેમિકલ અહીંયા નાખવામાં આવતું હોવાનું બહાર આવતા આખરે GPCBના અધિકારીએ જમીન માલિક અને કેમિકલ લાવીને નાખનારા ઈસમ સામે નાનાપોંઢા પોલીસ મથકમાં ફરિયાદ નોંધાવતા ચકચાર મચ્યો છે.
આ અંગેની જાણ કેટલાક જાગૃત નાગરિકોની થતા તેમણે આ સમગ્ર બાબતે વાપી GPCB કચેરીમાં જાણકારી આપી હતી. જેને લઇને GPCBના અધિકારી અને પોલીસની ટીમ સ્થળ પર પહોંચી જમીનમાં નાખવામાં આવી રહેલા આ કેમિકલની તપાસ કરતા કેટલાક સેમ્પલ મેળવ્યા હતા. આ સેમ્પલમાં બહાર આવ્યું છે કે, આંખોમાં આવી રહેલું આ કેમિકલ પર્યાવરણને નુકશાન કર્તા છે.
આ કેમિકલના પીએચ અને રંગવાળું આ કેમિકલ આસપાસના વિસ્તારને પણ હાનિકારક હોવાનું બહાર આવ્યું હતું. જે કારણે પર્યાવરણ વિભાગના વૈજ્ઞાનિક અધિક્ષક શૈલેષભાઈ પટેલ દ્વારા નાના પોન્ડા પોલીસ મથકમાં જમીન માલિક નાઝીર ભાઈ તેમજ અહીં કેમિકલ નાખનારા સાજીદ નામના ઈસમ સામે પોલીસ મથકમાં ફરિયાદ કરવામાં આવી હતી. આ અંગે નાના પોન્ડા પોલીસે પર્યાવરણ સુરક્ષા અધિનિયમ 7, 8, 15 અને 16 તેમજ IPCની કલમ 185, 268 અને 114 અન્વયે ગુનો નોંધી આ સાજીદ નામના ઇસમની શોધખોળ શરૂ કરી છે.
ઉલ્લેખનીય છે કે, થોડા દિવસ અગાઉ કપરાડા તાલુકાના કોઠાર ગામે પણ કેમિકલ કચરો નાખવામાં આવી રહ્યો હતો. જંગલ વિભાગના અધિકારીઓએ છાપો મારીને તપાસ ચલાવી હતી. જો કે, જે બાદ આ અંગે પણ ફરિયાદ થતા ઉહાપોહ મચ્યો હતો.
બાબરખડક ગામે જ્યાં આ જમીન આવેલી છે. આ કેમિકલ કરવામાં આવી રહ્યું છે. એની નજીકમાં જ પ્રાથમિક શાળા પણ આવેલી છે. આસપાસનાં વિસ્તારમાં ભૂલકાઓ અભ્યાસ અર્થે આવે છે, ત્યારે આ કેમિકલની સીધી અસર એમને પણ થઈ શકે એમ છે. શું પોતાના અંગત સ્વાર્થ માટે જમીનમાં કેમિકલ નાખી પર્યાવરણ અને આસપાસના લોકોના આરોગ્ય સાથે ચેડા કરવા યોગ્ય કહી શકાય?
હાલ તો આ સમગ્ર બાબતને લઈને સ્થાનિકોમાં ભારે રોષની લાગણી જોવા મળી રહી છે. બીજી તરફ પોલીસ ફરિયાદ થતાની સાથે જ અહીં કેમિકલ નાખનારાઓ પોતાનો બચાવ કરવા માટે એડી ચોટીનું જોર લગાવી રહ્યા છે.
