વડોદરા: ક્રાઈમબ્રાન્ચ પોલીસ મથકના જવાનો પેટ્રોલિંગમાં હતા તે દરમિયાન તેમને બાતમી મળી હતી કે, નેશનલ હાઈવે નંબર 8 ઉપર ગોલ્ડન ચોકડી તરફથી દુમાડ ચોકડી તરફ રશન રાઠવા નામનો વ્યક્તિ ઈન્ડિકા કારમાં ભારતીય બનાવટનો વિદેશી દારૂનો જથ્થો છુપાવી દુમાડ ચોકડી પાસેથી પસાર થવાનો છે.
પોલીસે બાતમીના આધારે કારને કોર્ડન કરી અટકાવી હતી. ચાલકની પ્રાથમિક પૂછપરછ દરમિયાન ચાલક રશન રાઠવા (રહે. ભુમસવાડા ગામ છોટાઉદેપુર)નો હોવાનું બહાર આવ્યું હતું. પોલીસે કારની તપાસ કરતા જુદી જુદી જગ્યાએ છુપાવેલી વિદેશી દારૂની રૂ. 24,940ની કિંમત ધરાવતી 58 બોટલો મળી આવી હતી. આરોપીએ આ દારૂનો જથ્થો દુમાડ ગામના નરેશ નામના વ્યક્તિને આપવાનો હોવાનું જણાવ્યું હતું. સમા પોલીસે વિદેશી દારૂનો જથ્થો, રોકડા રૂપિયા, મોબાઈલ ફોન ઈન્ડિકા કાર સહિત રૂ. 98,630નો મુદ્દામાલ જપ્ત કર્યો હતો.