વડોદરા: મહારાજા સયાજીરાવ યુનિવર્સિટીમાં વિદ્યાર્થી સંગઠનો દ્વારા આયોજિત યુથ ફેસ્ટિવલ 'અપર્ણમ-2020' અંતર્ગત વિવિધ કાર્યક્રમો યોજવામાં આવી રહ્યાં છે, ત્યારે આગામી તારીખ 14 ફેબ્રુઆરીએ રિલીઝ થનારી પ્રથમ ગુજરાતી ડાન્સ આધારિત ફિલ્મ 'સક્સેસ ઝીરો કિલોમીટર'ના કલાકારો ધર્મેશ યેલાંડે અને મનીષા ઠક્કર તેમાં હાજર રહ્યા હતા.જ્યાં તેમણે પત્રકારો સાથે પોતાની ફિલ્મ અંગે ચર્ચા કરી હતી.
અક્ષય યાજ્ઞિક દ્વારા દિગ્દર્શિત નૃત્ય પર આધારિત આ ગુજરાતી ફિલ્મમાં ટેલીવિઝન રિયાલીટી શો 'ડાન્સ ઇન્ડિયા ડાન્સ' વડે લોકપ્રિયતા મેળવનારા ધર્મેશ યેલાંડે અને મનીષા ઠક્કર મુખ્ય ભૂમિકામાં જોવા મળશે. આ ઉપરાંત ફિલ્મમાં શિવાની જોશી પણ ધર્મેશ યેલાંદેની ગર્લફ્રેન્ડની ભૂમિકામાં જોવા મળશે. આ ફિલ્મમાં ધર્મેશ કોલેજનો એક વિદ્યાર્થી, યુવક અને ત્યારબાદ આધેડ વયનો વ્યક્તિ એમ ત્રણ વિવિધ ઉંમરની વ્યક્તિઓના પાત્રો ભજવી રહ્યો છે.
