વડોદરા: બાગેશ્વરધામ પીઠાધિશ્વર પંડિત ધીરેન્દ્ર શાસ્ત્રીના દિવ્ય દરબારના કાર્યક્રમને લઈ શહેરના નવલખી મેદાન ખાતે તડામાર તૈયારીઓ ચાલી રહી છે. આ કાર્યક્રમમાં રાજ્યના ગૃહ પ્રધાન હર્ષ સંઘવી ઉપસ્થિત રહી શકે તેવી સંભાવનાઓ હાલમાં જોવા મળી રહી છે. હાલમાં કાર્યક્રમને એક દિવસ બાકી છે, ત્યારે સ્ટેજ સહિત લાઇટિંગ અને બેઠક વ્યવસ્થા આયોજન પૂર્ણતાને આરે છે.
" ઉચ્ચકક્ષાના પોલીસ અધિકારીઓમાં 3 ડી.સી.પી, 7 એ.સી.પી, 15 પી.આઈ, 30 પી.એસ.આઈ સહિત 500 પોલીસ કર્મીઓનો ચુસ્ત બંદોબસ્ત જોવા મળશે. સાથે 200 જેટલા હોમગાર્ડ પણ ફરજ બજાવશે. સુરત, અમદાવાદ અને રાજકોટના કાર્યક્રમ બાદ વડોદરા શહેરમાં પણ લાખોની સંખ્યામાં ભાવીભક્તો આવી પહોચશે તેવી સંભાવનાઓને જોતા તૈયારીમાં બદલાવ પણ કરવામાં આવ્યા છે." - આર.બી.ચૌહાણ, રાવપુરા પોલીસ મથક
કલાકારો રમઝટ બોલાવી મંત્રમુગ્ધ કરશે: આ કાર્યક્રમમાં પંડિત ધીરેન્દ્ર શાસ્ત્રી જો લેટ આવે અથવા શરૂઆતમાં લોકોને ઉત્સાહિત કરવા માટે નવશક્તિ ગરબા મહોત્સવના સિંગરો ગીતોની રમઝટ બોલાવશે. આ કાર્યક્રમમાં સિંગર નિલેશ પરમાર, અનુષ્કા પંડિત, અપેક્ષા પંડ્યા અને ઉમેશ બારોટ સહિતના વિવિધ કલાકારો દ્વારા ગીતો ગાઇ લોકોને ઉત્સાહિત કરવામાં આવશે.
20 હજારથી વધુ ઓનલાઈન રજિસ્ટ્રેશન: દિવ્ય દરબારના કાર્યક્રમમાં સિનિયર સિટીઝનને બેસવા માટે કોઈપણ અગવડ ન પડે તે માટે અગાઉથી જ રજીસ્ટ્રેશન કરવામાં આવ્યું છે. આ કાર્યક્રમને લઈ હાલમાં રજીસ્ટ્રેશન બંધ કરવામાં આવી છે. હાલ સુધીમાં સિનિયર સિટીઝન દ્વારા 20 હજારથી પણ વધુનું રજીસ્ટ્રેશન કરવામાં આવ્યું છે. જે તમામ માટે ખુરશીમાં બેઠક વ્યવસ્થા કરવામાં આવશે. તદુપરાંત હજારોની સંખ્યામાં લોકો ભારતીય બેઠક વ્યવસ્થા પ્રમાણે નીચે બેસીને કાર્યક્રમમાં જોડાશે.
