દક્ષિણ ગુજરાતમાં શેરડીનું વાવેતર પૂરજોશમાં, માફકસર વરસાદના કારણે ખેડૂતો ખુશખુશાલ

તાપીઃ દક્ષિણ ગુજરાતના ખેડૂતો માટે સુગર ફેકટરીને જીવાદોરી સમાન છે, ત્યારે ગત વર્ષની સરખામણીમાં આ વર્ષે ચોમાસાની સીઝન સારી રહેતા શેરડીની રોપણીમાં ભૂમિપુત્રો જોતરાયા છે. કૃષિ વિશેષજ્ઞોના જણાવ્યા અનુસાર ગત વર્ષ કરતા શેરડીની રોપણીમાં 20 થી 25 ટકા વધારો થવાની શક્યતાઓ છે.

સુરત જિલ્લાના ખેડૂતો શેરડીના પાકને પ્રાધાન્ય આપે છે. ગયા વર્ષે ઓછા વરસાદના કારણે ખેડૂતોને શેરડીના પાકમાં ઘણું નુકશાન થયું હતુ. ઓછા વરસાદના કારણે શેરડીનું વાવેતર ઘટ્યું હતુ. પરંતુ આ વર્ષે સુરત જિલ્લામાં વાવણી લાયક વરસાદ થતાં શેરડીનો પાક લેતા ખેડૂતોમાં આનંદ વ્યાપ્યો છે.

સુગર ફેકટરીઓના પીલાણની સીઝન ઓક્ટોબર માસમાં શરૂ થતી હોય છે, પરંતુ પીલાણની સિઝનની શરૂઆતમાં જ શેરડીના કટિંગ સાથે પીલાણ થાય તો ખેડૂતોને ફાયદો થતો હોય છે. જેથી શેરડીનો પાક કરતા ખેડૂતો ઓગસ્ટના અંતમાં અથવા તો સપ્ટેમ્બરના શરૂઆતમાં રોપણી કરતા હોય છે. હાલ 15 સપ્ટેમ્બર સુધી માં 32 હજાર એકરમાં વાવેતર નોંધાયું છે. જે ગત વર્ષની સરખામણી માં 8 ટકા જેટલું વધારે છે એટલે કે સપ્ટેમ્બરના અંતમાં ગતવર્ષની સરખામણીમાં 20 થી 25 ટકા જેટલો વધારો થાય તેવી શક્યતાઓ છે.

શેરડીના પાકને સિંચાઇ માટે પાણી પૂરતાં પ્રમાણમાં આપવું પડે છે. ગયા વર્ષે વરસાદ ઓછો રહેતા કુવા અને બોર ધરાવતા ખેડૂતોજ રોપણી કરી શક્યાં હતા. જોકે આ વર્ષે વરસાદ સારો રહેતા સિંચાઈનું પૂરતું પાણી પણ સીઝનમાં મળી રહેશે. જેથી શેરડીના વાવેતરમાંમાં વધારો થશે. જેના કારણે ખાંડના ઉત્પાદનમાં પણ વધારો નોંધાશે.

તાલુકાદીઠ શેરડીનું વાવેતર(15 સપ્ટેમ્બર સુધી)

તાલુકો	વાવેતર
બારડોલી	11,000 એકર
મઢી	7,664 એકર
ચલથાણ	7,284 એકર
મહુવા	4,018 એકર
સાયણ	1,595 એકર
કામરેજ	631 એકર