ભારતીય દિવ્યાંગ ડિસેબલ ક્રિકેટ બોર્ડ અને વડોદરા ડિસેબલ વેલ્ફેર ક્રિકેટ બોર્ડ દ્વારા દિવ્યાંગ મહિલા ક્રિકેટ કોચિંગ કેમ્પનું આયોજન કરવામાં આવ્યું હતું. જેમાં ગુજરાત, મહારાષ્ટ્ર, ઓરિસ્સા, રાજસ્થાન, ઉત્તરાખંડ અને ઉત્તરપ્રદેશની દિવ્યાંગ ખેલાડીઓએ ભાગ લીધો હતો. જેમાં ગુજરાતના ખેલાડીઓની પસંદગી થઈ હતી. જેમાં વ્યારા તાલુકાના ડોલવણના બરડીપાડા ગામની દિવ્યાંગ મહિલા રમીલાબેનનું પણ સિલેક્શન થયું હતું. આદિવાસી ક્ષેત્રના નાનકડા ગામમાંથી એક દિવ્યાંગ મહિલાનું ક્રિકેટમાં સિલેક્શન થતા તેના માતા-પિતા સહિત ગ્રામજનો પણ ખુશ થયા હતા.
રમીલા બેન એમ.એ.બી.એડ છે. તેમને પહેલા થી જ રમતગમત નો શોખ હતો. પરંતુ હાથની તકલીફ ન કારણે તેમને ડર લાગતો હતો, પરંતુ કોલેજમાં ગયા પછી તેમણે કબડ્ડી અને અન્ય રમતોમાં ભાગ લેવાનું શરૂ કર્યું. જે બાદ 2011માં સોનગઢ આઈટીઆઈમાં લોન્ગ જમ્પ, હાઈ જમ્પ અને દોડવાનું શરૂ કર્યું હતું.. જે બાદ સ્વિમિંગમાં પણ તેમણે હાથ અજમાવ્યો હતો અને સ્વિમિંગમાં તેઓ વિજેતા પણ થયા હતા. હાલમાં બરોડા ખાતે સૌ પ્રથમવાર દિવ્યાંગ મહિલા ક્રિકેટ ટીમ માટે કોચિંગ કેમ્પની શરૂઆત થઇ હતી. જેમાં કોચ હિતેન્દ્રભાઈના માર્ગદર્શન હેઠળ રમીલાબેન રમ્યા હતા અને તેમનું સિલેક્શન થયું હતું.
રમીલાબેન અને તેમના માતા પિતા ખેડૂત છે. તેઓ ખેતી કરીને ગુજરાન ચલાવે છે. રમીલાબેન દિવ્યાંગ હોવા છતાં પણ ક્રિકેટનો શોખ ધરાવે છે. તેમણે પોતાની કમીને નજર અંદાજ કરીને ક્રિકેટમાં આગળ વધ્યા છે. તેઓના મતે ભલે તેઓના હાથમાં ખામી રહી તે છતાં પણ તેઓ તેમના ગામ,માતા પિતા, જિલ્લા અને ગુજરાતનું નામ રોશન કરશે.
