ભંગારિયાઓનાં આ કૃત્યથી વાહન ચાલકોને અને આસપાસ રહેતા લોકોને દુર્ગંધ,શ્વાસ રૂંધાવા સહિત અનેક સમસ્યાઓનો સામનો કરવો પડી રહ્યો છે. બલિઠા ગામની હદમાં સળગાવાતા આ કચરાના ધુમાડાથી ફેલાતા પ્રદૂષણથી સલવાવ ગામના રહેવાસીઓ પણ પરેશાન છે. તો ભંગારિયાઓએ પંચાયતને જાણે ઘરની મિલકત સમજી હોય તેમ સ્મશાન ભૂમિને પણ ભંગારનું ગોડાઉન બનાવી દીધું છે.
જ્યારે પણ કોઈ તેઓ સામે રજૂઆત કરવા જાય છે. ત્યારે, તેમને હડધૂત કરી દાદાગીરી કરે છે અને અમે પંચાયતને હપ્તા આપીએ છીએ અમારું કાઈ બગડશે નહીં, તેવી દાદાગીરી કરે છે. ત્યારે, હવે ગામના સરપંચ-સભ્યો તો આ ભંગારિયાઓના ખોળે બેસી ગયા બાદ ગામલોકો દોજખ ભરી જિંદગી જીવવા ટેવાઈ ગયા છે અને કોઈ આ મુદ્દે અવાજ ઉઠાવતું નથી.
આશા રાખીએ કે જે રીતે ગુજરાત પ્રદુષણ બોર્ડ અને નેશનલ ગ્રીન ટ્રીબ્યુનલ ઉદ્યોગકારો પર પ્રદૂષણના મુદ્દે તવાઈ બોલાવે છે. તેવી તવાઈ આ ભંગારિયાઓ પર બોલાવે તો જ આ પ્રદુષણ પર અંકુશ આવશે અને ગામ લોકો માટે સાચા અર્થમાં આદર્શ રહેઠાણવાળું ગામ બનશે. બાકી તો ડુંગરા અને છીરીની પરિસ્થિતિની જેમ ભંગારિયાઓનાં ગામની ઉપમા મળશે.
અહીં ઉલ્લેખનીય છે કે, સુરતમાં તક્ષશિલા અગ્નિકાંડમાં જે રીતે બાળકોના જીવ ગયા તેનાથી વિપરીત આ વિસ્તારોમાં રોજ ભંગારના ગોડાઉનમાં લાગતી આગનો ધૂમાડો અને કેમિકલયુક્ત વેસ્ટ કચરાનું પ્રદુષણ ધીમું ઝેર બન્યું છે. જે દરરોજ હજારો લોકોને ધીરેધીરે મોત તરફ ધકેલી રહ્યું છે. પરંતુ તે માટે તંત્ર નિયમોના વાઘામાં કે પૈસાની લાલચમાં એક્શન મોડમાં આવતું નથી.
