ભૂરી નામની લેડી ડોનના આતંક બાદ હવે સ્પાની મહિલા સંચાલકની ડોનગીરી સામે આવી છે. દુકાનદાર દ્વારા છૂટ્ટા રૂપિયા નહીં આપતા સ્પા મહિલા સંચાલકે દુકાનદાર સહિત તેના માસૂમ પુત્ર પર તીક્ષ્ણ ચપ્પુ વડે જીવલેણ હુમલો કર્યો હતો. જોકે હુમલાની ઘટના વરાછા પોલીસ ચોકીના 200 મીટરના અંતરમાં જ બનવા પામી હતી જેને લઇ કાયદો અને વ્યવસ્થાની સ્થિતી સામે પણ અનેક સવાલો ઉભા થયા છે. વરાછા પોલીસ દ્વારા સ્પાની મહિલા સંચાલક સહિત ત્રણ લોકોની ધરપકડ કરી આગળની કાર્યવાહી હાથ ધરવામાં આવી છે.
વરાછા વિસ્તારમાં લેડી ડોનના આતંક બાદ સ્પાની મહિલા સંચાલકનો આતંક સામે આવ્યો છે. આજરોજ વરાછાના લાભેશ્વર ચોક નજીક કરિયાણાની દુકાન ધરાવતા વેપારી સહિત તેના માસૂમ પુત્ર પર સ્પાની મહિલા સંચાલક દ્વારા જીવલેણ હુમલો કરવામાં આવ્યો હતો. હુમલો કરવા પાછળનું કારણ એવુ હતુ કે સ્પાની મહિલા સંચાલક ભાવના ચાવડા એ કરિયાણાની દુકાન ચલાવતા સંજય પ્રજાપતિ પાસે છુટ્ટા રૂપિયાની માંગ કરી હતી. છૂટ્ટા રૂપિયા ન હોવાથી મહિલાને વેપારીએ સ્પષ્ટ ના પાડી દીધી હતી. જ્યાં રકઝક બાદ સ્પા સંચાલક ભાવના ચાવડાએ તીક્ષ્ણ ચપ્પુ વડે વેપારી અને તેના માસૂમ પુત્ર પર જીવલેણ હુમલો કરી દીધો હતો. ઘટના બાદ સ્થાનિક લોકોના ટોળેટોળા ત્યાં ઘસી ગયા હતા અને ઘટનાની જાણકારી વરાછા પોલીસને કરી હતી. મહત્વ ની બાબત એ છે કે જ્યાં ઘટના બની ત્યાંથી આશરે 200 મીટરના અંતરમાં જ વરાછા લાભેશ્વર પોલીસ ચોકી પણ આવી છે. જેથી કાયદા અને વ્યવસ્થાની સ્થિતિ સામે પણ સવાલ ઉભા થયા છે. ઘટનાની જાણ થતાં વરાછા પોલીસ સહિતનો કાફલો ઘટના સ્થળે દોડી ગયો હતો અને સ્પાની મહિલા સંચાલક સહિત બીજી બે મહિલાની અટકાયત કરી પોલીસ મથકે લઈ જવામાં આવી હતી. બીજી તરફ ઇજાગ્રસ્ત પિતા- પુત્રને નજીકની ખાનગી હોસ્પિટલમાં સારવાર અર્થે ખસેડવામાં આવ્યા હતા .જ્યાં બંનેની હાલત હાલ સુધારા પર હોવાનું જાણવા મળ્યું છે.
પોલીસ સૂત્રો પાસેથી મળતી માહિતી અનુસાર સ્પાની મહિલા સંચાલક ભાવના ચાવડા સામે અગાઉ પણ શહેરના જુદા જુદા પોલીસ મથકમાં 14 ગુના નોંધાઈ ચુક્યા છે. આજ કારણ છે કે ભાવના ચાવડા વરાછા વિસ્તારમાં એક માથાભારે તરીકેની પણ છાપ ધરાવે છે. દારૂના નશા સહિત તેના પર લૂંટના ગુના નોંધાઇ ચુક્યા છે અને ધરપકડ પણ થઈ ચૂકી છે. એટલું જ નહીં ભાવના ચાવડા દ્વારા ટિક ટોક એપ્લિકેશન પર કેટલાક વીડિયો પણ અપલોડ કરવામાં આવ્યા છે. અને જેમાં તેના હજારો ફોલોવર્સ છે. જે પ્રકારે ટિક ટોક પર વીડિયો અપલોડ કરવામાં આવ્યા છે તેને લઈ ચોક્કસથી કહી શકાય કે ભાવના ચાવડાનું બેકગ્રાઉન્ડ ક્યાં પ્રકારનું હોય શકે. જો કે હાલ તો લેડી ડોન ભાવના ચાવડા સહિત ત્રણ મહિલાઓની વરાછા પોલીસે ધરપકડ કરી આગળની વધુ તપાસ હાથ ધરી છે.
