સુરત પોલીસ આજે પોતાના જ વિભાગના પોલીસ હેડ કોન્સ્ટેબલની ધરપકડ કરવા મજબૂર થઈ છે. સુરતના મહિધરપુરા પોલીસ મથકમાં ફરજ બજાવતા હેડ કોન્સ્ટેબલ જીતેન્દ્ર ચૌહાણ પર આરોપ છે કે, તેણે એક મહિલા સહિત બે લોકો સાથે મળીને હીરા વેપારીને હનીટ્રેપમાં ફસાવ્યો હતો અને બ્લેકમેલ કરી 70 હજાર પડાવી લીધા હતા. આ અંગે હીરા વેપારીએ પોલીસ મથકમાં ફરિયાદ નોંધાવી હતી કે, અક્ષર ટાઉનશીપમાં એક ફ્લેટમાં વેપારીને મહિલાએ શરીર સુખ માણવા બોલાવ્યો હતો. ત્યારબાદ અંગત પળોના ફોટો અને વીડિયો બનાવી લીધા હતા. ત્યારબાદ બાદ એક ઇસમ પોલીસ યુનિફોર્મમાં અન્ય 3 લોકો સાથે આવીને હેડ કોન્સ્ટેબલ જીતેન્દ્ર વેપારીને ધમકી આપી કેસ કરી દેવાની ધમકી આપી હતી.
આ યુનિફોર્મમાં આવેલા જીતેન્દ્રને જોઈને હીરા વેપારી ગભરાઈ ગયો હતો. પોતાની ઈજ્જત બચાવવા માટે તેણે તાત્કાલિક પહેલા 60,000 અને પછી 10,000 એમ 70,000 રોકડા રૂપિયા આપી દીધા હતા. પરંતુ 70,000 મળ્યા બાદ પણ આ ગેંગ ફરીથી રૂપિયાની માગ ચાલુ રાખતા આખરે તેમના બ્લેકમેઇલિંગથી ત્રસ્ત વેપારીએ પોલીસ મથકમાં ફરિયાદ નોંધાવી હતી. આરોપી હેડ કોન્સ્ટેબલ મહિધરપુરા પોલિસ મથકમાં ફરજ બજાવે છે. આગાઉ આ મામલે પુણે પોલીસ મહિલા સહિત ત્રણની ધરપકડ કરી ચુકી છે, જ્યારે આરોપી જીતેન્દ્રની ધરપકડ બાકી હતી અને આખરે પોલીસને પોતાના જ વિભાગના પોલીસકર્મીની ધરપકડ કરવાની ફરજ પડી હતી. પોલીસે એક આરોપીની જેમ જ પોતાના ફરાર પોલીસકર્મીની ધરપકડ કરીને કાયદેસરની કાર્યવાહી હાથ ધરી છે.
