સુરત : દેશભક્ત સુરક્ષા કર્મીના કારણે 1962ના ભારત-ચીન યુદ્ધમાં શહીદ થયેલા રાજસ્થાનના જવાનના પરિવારને છ દાયકા બાદ તેમની તસ્વીર મળી શકે છે. શહિદના પરિવારજનો ગામમાં તેમના પુત્રની પ્રતિમા સ્થાપિત કરવા માંગતા હતા, પરંતુ ફોટોગ્રાફના અભાવે તેમની ઈચ્છા પૂરી થઈ શકી ન હતી. તેઓ દુઃખી હતા, પરંતુ એક સુરક્ષા ગાર્ડના કારણે 60 વર્ષ બાદ તેમને તેમના શહીદ પુત્રનો ફોટો મળ્યો હતો.
શું છે સમગ્ર વાત : રાજસ્થાનના જોધપુર જિલ્લાના ડાબરી ગામના સુજાન સિંહ 1962ના ભારત-ચીન યુદ્ધમાં શહીદ થયા હતા. આખા પરિવારને તેમની શહાદત પર ગર્વ હતો, પરંતુ પરિવારમાં સુજાન સિંહની કોઈ તસવીર ન હતી, જેના કારણે શહીદ પરિવાર ઈચ્છે તો પણ તેમની પ્રતિમા સ્થાપિત કરી શક્યો ન હતો. જેના કારણે પરિવાર દુઃખી હતો. શહીદના પરિવાર દ્વારા તેમના ઘરના દીકરાનીની તસવીર દરેક જગ્યાએ શોધવામાં આવી હતી, પરંતુ તેમની તસવીર મળી ન હતી. પરિવારએ ક્યારેય વિચાર્યું પણ ન હતું કે, 60 વર્ષ બાદ શહીદ જવાનની તસવીર રાજસ્થાનથી દૂર ગુજરાતના સુરત શહેરમાં એક સુરક્ષા કર્મી પાસેથી મળશે. જે તસવીર પરિવારના લોકો પાસે મળી નથી તે અજાણ્ય સુરક્ષા કર્મી પાસેથી મળી આવી હતી.
સૈનિકોના પરિવારોની માહિતી એકત્ર કરી રહ્યા : બહાદુર સુજાન સિંહના પરિવારજનોએ ઘણો પ્રયાસ કર્યો પણ ફોટો ન મળ્યો. થોડા દિવસો પહેલા કંઈક એવું બન્યું કે પરિવારની ખુશીનો કોઈ પાર ન રહ્યો. જ્યારે તેમને ખબર પડી કે ગુજરાતના સુરતમાં સ્થિત સરદાર વલ્લભભાઈ નેશનલ ઇન્સ્ટિટ્યૂટ ઓફ ટેકનોલોજી (SVNIT)ના સિક્યુરિટી ગાર્ડ જીતેન્દ્ર સિંહ ગુર્જર પાસે શહીદ સુજાન સિંહનો ફોટો છે. સુરત સ્થિત સરદાર વલ્લભભાઈ નેશનલ ઇન્સ્ટિટ્યૂટ ઓફ ટેકનોલોજી (SVNIT)ના સુરક્ષા ગાર્ડ જીતેન્દ્ર સિંહ ગુર્જર વર્ષોથી ભારત માટે યુદ્ધ ભૂમિમાં ઉતરનાર અને તેમાં શહીદ થયેલા સૈનિકોના પરિવારોની માહિતી એકત્ર કરી રહ્યા છે.
આ પણ વાંચો : અમદાવાદના શહીદ ગોપાલસિંહ ભાદોરિયાના પિતાની વેદના, શૌર્ય ચક્ર પાછું મોકલાવ્યું તેનું કારણ જાણો
સૈન્યના રેકોર્ડમાંથી મળેલો ફોટો સોંપ્યો : જીતેન્દ્ર ગુર્જરએ જણાવ્યું હતું કે, આ તેમનો શોખ છે. તે પોતે એક વખત સૈનિક બનવા માંગતો હતો, પરંતુ તેનું સ્વપ્ન સાકાર ન થયું. આ કારણે તેઓ શહીદ પરિવારોની માહિતી એકઠી કરે છે. શહીદના પરિવાર પોસ્ટકાર્ડ લખે છે. આવા જ એક દિવસે જીતેન્દ્ર સિંહને સુજાન સિંહનો ફોટો મળ્યો, ત્યારે તેણે ડિબરી ગામના પૂર્વ સરપંચ સંતોષ કંવરનો સંપર્ક કર્યો. આ દરમિયાન જાણવા મળ્યું કે, પરિવાર પાસે સુજાન સિંહની કઈ તસવીર નથી. જિતેન્દ્ર સિંહ જ્યારે પૂર્વ સરપંચ મારફત સુજાન સિંહના પરિવારજનોને મળ્યા અને સૈન્યના રેકોર્ડમાંથી મળેલો ફોટો સોંપ્યો ત્યારે પરિવારની ખુશીનો પાર ન રહ્યો.
આ પણ વાંચો : સંતનો સધિયારો: સંતાપના માહોલમાં બાપુ શહીદ જવાનોના પરિવારની આર્થિક મદદે
5000થી વધુ પોસ્ટકાર્ડ શહીદોના પરિવારોને મોકલ્યા : જિતેન્દ્ર સિંહ ગુર્જને અત્યાર સુધીમાં 5000થી વધુ પોસ્ટકાર્ડ શહીદોના પરિવારોને મોકલ્યા છે. તેમની પાસે પ્રથમ વિશ્વ યુધ્ધથી આજ દિન સુધી 2.07 લાખ જવાનોની જાણકારી એકત્ર કરી છે. તેઓ કારગીલ યુદ્ધના સમયેથી શહીદ પરિવારને પત્ર લખે છે. કુલ 10,500 જેટલા શહીદ પરિવાર સાથે સંપર્કમાં છે. 13,400 શહીદ જવાનોની તસવીર તેમની પાસે છે. 300 જેટલી નાની પ્રતિમા તેઓએ શહીદ જવાનોની બનાવી છે. જીતેન્દ્ર ગુર્જરએ વધુમાં જણાવ્યું હતું કે, તે છેલ્લા 20 વર્ષથી આ કરી રહ્યા છે અને તેનાથી શહીદોના પરિવારજનો ખુશ થાય છે. શહીદના પરિવારને લાગે છે કે આજે પણ કોઈ તેમને યાદ કરે છે. તેઓ એક રજીસ્ટર પણ રાખે છે. જેમાં દેશ માટે પોતાનો જીવ બલિદાન આપનાર દરેક શહીદનો ડેટા તેમાં રાખે છે
