સુરત: જિલ્લામાં બનતા મોબાઈલ સ્નેચિંગ તેમજ વાહન ચોરીના ગુનાઓને ડામવા સુરત ક્રાઇમ બ્રાન્ચે ભારે કમરકસી છે, ત્યારે શહેરમાં રસ્તે ચાલતા રાહદારીઓ પાસેથી મોબાઈલ સ્નેચિંગ તેમજ લૂંટ ચલાવતી ગેંગને સુરત ક્રાઇમ બ્રાન્ચે ઝડપી પાડી છે.
સુરત ક્રાઇમ બ્રાન્ચને મળેલી માહિતીના આધારે લીંબાયત વિસ્તારમાંથી આરોપી અસપાક શા અને વકીલ અહમદ અન્સારીને ઝડપી પાડયા હતા. આરોપીઓ પાસેથી ક્રાઇમ બ્રાન્ચને સ્નેચિંગ કરેલા મોબાઈલ તેમજ ચોરીના વાહનો સહિત ઘાતક હથિયાર મળી આવ્યું હતું.
આ આરોપીઓની ઊંડાણપૂર્વકની પૂછપરછ કરતા પર્વત પાટિયા વિસ્તારમાં રહેતા સર્વેશ ચૌરસિયાનું નામ બહાર આવ્યું હતું. સર્વેશના ત્યાં તપાસ કરતા સ્નેચિંગ કરેલા અન્ય મોબાઇલ મળી આવ્યા હતા. જે મોબાઈલ આરોપીઓ પાસેથી કમિશનથી વેચવા માટે લીધા હોવાની હકીકત બહાર આવી હતી. જ્યાં ક્રાઇમ બ્રાન્ચની તપાસ દરમિયાન ઉધના, લીંબાયત, ખટોદરા તેમજ ડુમસ પોલીસ ચોપડે નોંધાયેલ મોબાઇલ સ્નેચિંગ સહિત લૂંટના 12 જેટલા ગુનાનો ભેદ ઉકેલાઈ ગયો હતો. ક્રાઇમ બ્રાન્ચે આરોપીઓ પાસેથી 1.80 લાખનો મુદ્દામાલ કબ્જે કરી વધુ તપાસ હાથ ધરી હતી.
