સુરતઃ શહેરના અડાજન વિસ્તારમાં આવેલા પીઝા રેસ્ટોરન્ટમાં પીઝાની અનેક વેરાયટી સાથે ખાસ સુવિધા પણ ઉભી કરવામાં આવી છે. આ ખાસ સુવિધા રેસ્ટોરન્ટમાં આવતી મહિલાઓ માટે છે. મહિલાઓ માટે પીરિયડ્સને ધ્યાનમાં રાખી અને આ સામે હાયજીન બની રહે એ માટે રેસ્ટોરન્ટ દ્વારા સેનેટરી પેડ વેન્ડીંગ મશીન મૂકવામાં આવ્યું છે. જેથી રેસ્ટોરન્ટમાં આવેલી મહિલાઓને પીરિયડ્સની તકલીફ પડે તો આ વેન્ડીંગ મશીન દ્વારા સેનેટરી પેડનો ઉપયોગ કરી શકે છે. રેસ્ટોરન્ટ દ્વારા આ સુવિધા માત્ર રેસ્ટોરન્ટમાં આવનારી મહિલાઓ માટે જ નહીં, પરંતુ દરેક મહિલાઓ રેસ્ટોરન્ટમાં જઈને તે આ લાભ મેળવી શકે છે.
સુરતના અડાજણ વિસ્તારમાં આવેલા પીઝા રેસ્ટોરન્ટ હાલ શહેરમાં ચર્ચાનો વિષય બની ગયો છે. અહીં સ્વાદિષ્ટ અને ચટાકેદાર પીઝા તો મળે જ છે, પરંતુ અહીં આવનારી મહિલાઓ માટે ખાસ સુવિધા રેસ્ટોરન્ટ દ્વારા ઉભી કરવામાં આવી છે. અનેકવાર મહિલાઓ બહાર જતી હોય છે અને ત્યાં જ પીરિયડ્સ આવી જવાની સ્થિતિ ઊભી થતી હોય છે. મહિલાઓની આવી સ્થિતિને ધ્યાનમાં રાખી રેસ્ટોરન્ટના સંચાલક દિવ્યેશ દ્વારા આ ખાસ સુવિધાઓ ઉપલબ્ધ કરાવવામાં આવી છે. રેસ્ટોરન્ટના વોશરૂમમાં મહિલાઓ માટે સેનેટરી પેડ વેન્ડીંગ મશીન મુકવામાં આવ્યું છે. પીરિયડ્સની સ્થિતિમાં જેનો ઉપયોગ મહિલાઓ કરી શકે છે અને તેમના હાઇજિન માટે પણ આ ખુબ જ ઉપયોગી છે.
રેસ્ટોરેન્ટ સંચાલક દિવ્યેશે જણાવ્યું હતું કે, જ્યારે પેડમેન ફિલ્મ આવ્યું ત્યારે તેઓને આ કોન્સેપ્ટ ધ્યાનમાં આવ્યો હતો. મહિલાઓને લગતી આ સમસ્યાને લઇ તેઓએ રેસ્ટોરન્ટમાં સેનેટરી પેડ વેન્ડીંગ મશીન મૂક્યું છે. જેનો લાભ માત્ર રેસ્ટોરન્ટમાં આવનારી મહિલાઓ જ નહીં, પરંતુ રેસ્ટોરન્ટની આસપાસ આવેલી બેંક, સોપ અને અન્ય દુકાનોમાં આવતી મહિલાઓ પણ લઈ શકે છે. આ વેન્ડીંગ મશીનમાં 5 રૂપિયાનો સિક્કો નાખીને સેનેટરી પેડ લઈ શકે છે એ સિક્કો પણ મિહલાઓ રેસ્ટોરન્ટના કાઉન્ટર પરથી પણ લઈ શકે છે. બ્રાન્ડેડ સેનેટરી પેડની કિંમત 10 થી 12 રૂપિયા છે.
રેસ્ટોરન્ટની આ સુવિધા અંગે રેસ્ટોરન્ટમાં આવેલી ભાવિનીએ જણાવ્યું હતું કે, એક વખતે જ્યારે તેઓ રેસ્ટોરન્ટમાં આવ્યા હતા, ત્યારે તેમની દીકરીને અચાનક જ પીરિયડની સ્થિતિ ઊભી થઈ ત્યારે તેઓએ રેસ્ટોરન્ટના કાઉન્ટર પરથી માત્ર 5 રૂપિયાનો સિક્કો લઈ અહીંથી પેડ મેળવી લીધું હતું, આ સુવિધાના કારણે મહિલાઓને ખૂબ જ લાભ મળી રહ્યો છે. આવી રેસ્ટોરન્ટ તેઓએ અત્યાર સુધી જોઈ નથી. જે મહિલાઓ માટે આવી સુવિધા ઉપલબ્ધ કરાવે છે.
અન્ય મહિલા હેમાલીએ જણાવ્યું હતું કે, તેઓ વારંવાર આ રેસ્ટોરન્ટમાં આવતી હોય છે. ખાસ કરીને મહિલાઓની કીટી પાર્ટી માટે પણ તેઓ અહીં આવતી હોય છે, ત્યારે રેસ્ટોરન્ટની આ સુવિધા તેઓ માટે લાભકારી સિદ્ધ થઈ છે.
