ગૂગલ મેપથી મકાનો સર્ચ કરી ચોરીની ઘટનાને અંજામ આપતી ગેંગ ઝડપાઇ

સુરતમાં ક્રાઈમ બ્રાન્ચને આંતર રાજ્ય ગેંગને ઝડપી પાડવામાં સફળતા મળી છે. પોલીસે આ ગેંગના 5 આરોપીઓની ધરપકડ કરી છે અને કુલ 10 ગુનાના ભેદ ઉકેલી કાઢ્યા છે. આરોપીઓની મોડેસ ઓપરેન્ડી જાણીને ખુદ પોલીસ પણ ચોંકી ઉઠી હતી. આ ગેંગ ના સભ્યો સુરત નજીક હાઈવે ઉપર ભાડાનું મકાન રાખી ગૂગલ મેપથી ઝાડી ઝાંખરા વાળી જગ્યાની આસપાસના રો હાઉસ, બંગલા કે ગાળા ટાઈપના મકાનો સર્ચ કર્યા બાદ રેકી કરી રાત્રિના સમયે ચોરીના ગુનાને અંજામ અપાતા હતા.

સુરતઃ ડીસીબી પોલીસે બાતમીના આધારે ઘરફોડ ચોરી કરતી આંતર રાજ્ય બંગાળી ગેંગને ઝડપી પાડી હતી. તસ્કર ટોળકી પાસેથી રોકડા 5400, મોબાઈલ નંગ-6, બે કાંડા ઘડિ઼યાળ, સોના ચાંદીના દાગીના, ચોરી કરવાના સાધનો મળી કુલ રૂપિયા 43,125નો મુદ્દામાલ કબ્જે કર્યો હતો. આરોપીઓની પ્રાથમિક પૂછપરછમાં સુરતની આજુબાજમાં કીમ અને વરેલી ગામ ખાતે ભાડાના મકાન રાખી બપોરે જમ્યા બાદ બસ, છકડા કે ભાડાની ગાડીમાં સુરતથી ઝાડી ઝાખરા વાળી જગ્યાની આસપાસના રો હાઉસ, બંગલા સહિતની જગ્યાએ સાંજના અને રાત્રીના સુમારે રેકી કર્યા બાદ ઝાંડી ઝાખરામાં સંતાઈને રાત્રે દોઢથી બે કલાકમાં બંધ મકાને ટાર્ગેટ કરી દરવાજાના લોકનો નકુચો તોડી અંદર પ્રવેશ કરી ચોરી કરતા હતા. પોલીસની પુછપરછમાં ટોળકીએ રાંદેરના ત્રણ, વરાછાના બે, ખટોદરાના એક, વલસાડ રૂરલ, ટાઉનના ત્રણ અને સાબરમતી પોલીસ સ્ટેશનના એક મળી 10 ગુનાનો ભેદ ઉકેલાયો છે.

પકડાયેલા આરોપીઓના નામ

1. મોહમંદ નિઝામ ઉર્ફે આકાશ તાસીર શેખ (ઉ.વ.35, વરેલી ગામ વ્રજધામ સોસાયટી, મૂળ માઝરીયા, કેસપુર, જિલ્લો મેદનીપુર પશ્વિમ બંગાળ)
2. મોહમંદ ફારૂખ ઉર્ફે લોટોન અબ્દુલ શેખ (ઉ.વ.54,વરેલી ગામ વ્રજધામ સોસાયટી, મૂળ બડા બજાર કલકત્તા)
3. હાલીમ આબુલહુસૈન શેખ (ઉ.વ.30, વરેલી ગામ વ્રજધામ સોસાયટી, મૂળ દત્તપુગુર બારાસાત,જિલ્લો ઉત્તર ચોવીસી પરગાણા)
4. હફીઝુલ મંડલ કીબરીયા મંડલ(ઉ.વ.47, વરેલી ગામ,મૂળ સ્વરૂપદાહુ, જિલ્લો ઉત્તર ચોવીસી પરગાણા)
5. હસનાન ઉર્ફે સુમન જલાલ ખાન (ઉ.વ.30,વરેલી ગામ, મૂળ લાલટીન હીરા પહાડ ગુવાહાટી આસામ)ને ઝડપી પાડ્યા હતા.
   
   

રૂમ ભાડે રાખી આપતા હતા ચોરીની ઘટનાને અંજામ

પકડાયેલા આરોપીની પોલીસે કડક પૂછપરછ કરતા તેઓએ જણાવ્યું હતું કે, અગાઉ અજમેર ખાતે તેઓની મિત્રતા થયેલી અને તે પછી કીમ ખાતે દરગાહ આવ્યા ત્યારથી ભેગા થઈને રહી હાઈવે નજીક વરેલી ગામ તથા કીમ ખાતે ભાડાની રૂમ રાખી બપોરે જમીને બસમાં છકડા તેમજ ભાડાની ગાડીમાં સુરતથી ઝાડી ઝાખરા વાળી જગ્યાની આસપાસના રો હાઉસમાં રેકી કરતા હતા અને રાત્રે ઘરમાં ઘુસી ચોરીની ઘટનાને અંજામ આપતા હતા.

ગેંગ 2016 થી છે સક્રિય

ઝડપાયેલી ગેંગ 2016થી સક્રિય છે અને આવી જ રીતે ગુનાને અંજામ આપતા હતા. આવી રીતે તેઓએ આજ દિન સુધી ગુજરાતના અન્ય શહેરોમાં મળી કુલ 44 જેટલી ચોરીઓ કરી હોવાનું કબુલાત કરી છે. જેમાં અમદાવાદમાં 12, વડોદરામાં 8, ભરુચમાં 7, વલસાડમાં 6, સુરતમાં 5, બારડોલીમાં 2, બીલીમોરામાં 2 અને નડીયાદમાં 2 ચોરી કરી છે.

મોડેસ ઓપરેન્ડી શું હતી

સુરતની ડીસીબી પોલીસે બંગાળી ગેગના ઝડપાયેલા સાગરીતોની પૂછપરછમાં ચોંકાવનારી વિગત એ બહાર આવી હતી કે, તેઓ બે-બે તથા ત્રણ-ત્રણની જોડી બનાવીને સ્કૂલ બેગમાં સ્ક્રૂ ડ્રાઈવર, રેન્જ ઍકઝેસ્ટ પાનુ, ગણિશિયું અને ટોર્ચ લાઈટ લઈ જિલ્લા કે શહેરની હદમાં પ્રવેશ કરી ચોરી કરતા હતા. જે બાદમાં ટોળકી મકાનમાંથી મોપેડની પણ ચોરી કરતા હતા અને તેને સુરત નજીકના મેઈન બ્રિજની નીચે તથા હાઈ-વે પર આવેલા ઢાબા ખાતે પાર્ક કરી બીજી વખત ચોરીમાં ઉપયોગ કરતા હતા.

સુરતના પણ ગુનાના ભેદ ઉકેલાયા

પોલીસની પુછપરછમાં ટોળકીએ રાંદેરના ત્રણ, વરાછાના બે, ખટોદરાના એક, વલસાડ રૂરલ, ટાઉનના ત્રણ અને સાબરમતી પોલીસ સ્ટેશનના એક મળી 10 ગુનાનો ભેદ ઉકેલાયો છે.