સુરત : ડોક્ટરની બેદરકારીના કારણે દર્દીને તકલીફ થઈ હોય અથવા અમુક કિસ્સામાં જીવ ખોવા સુધી વાત પહોંચતી હોય છે. આવો જ એક કિસ્સો સુરતમાં બન્યો હતો. ઓપરેશન દરમિયાન વધુ લોહી વહી જતા મહિલાનું મોત નિપજ્યું હતું. મૃતક મહિલાના પરિજનોએ તબીબ પર બેદરકારીનો આરોપ મૂક્યો હતો. વર્ષ 2022 ની ઘટનાના રિપોર્ટમાં આનંદ હોસ્પિટલની બેદરકારી સામે આવી છે, જેના આધારે સરથાણાના ડોક્ટર સામે ગુનો દાખલ કરી વધુ તપાસ શરૂ કરવામાં આવી છે.
શું હતો મામલો ? બનાવની મળતી વિગત અનુસાર વર્ષ 2022 માં 25 જુલાઈના રોજ સરથાણા વિસ્તારમાં રહેતી પ્રિયંકાબેન વિવેકભાઈ અણઘણ, સરથાણા જકાતનાકા પાસે રોયલ આર્કેડના ત્રીજા માળે આવેલા આનંદ સર્જીકલ એન્ડ ઓર્થોપેડિક હોસ્પિટલમાં એપેન્ડિક્સના ઓપરેશન માટે દાખલ થયા હતા. આ સમયે ઓપરેશન કરનાર હોસ્પિટલના ડો. નિતેષકુમાર પરસોત્તમભાઈ સાવલિયાએ ઓપરેશન દરમિયાન બેદરકારી દાખવતા દર્દી પ્રિયંકાબેનના એપેન્ડીસની બાજુમાં આવેલ લોહીની નસમાં કાણું પડી ગયું હતું.
આ ઘટનામાં સરથાણા પોલીસે ઓપરેશન દરમિયાન બેદરકારી દાખવનાર આનંદ હોસ્પિટલના ડો. નિતેષકુમાર પરસોત્તમભાઈ સાવલિયા સામે ગુનો દાખલ કરી વધુ તપાસ હાથ ધરી છે. જરૂરી સેમ્પલ લઈ એફએસએલમાં ચકાસણી અર્થે મોકલ્યા હતા. -- વિરલ પટેલ (PI, સરથાણા પોલીસ મથક)
મૃતકના પરિજનોનો આક્ષેપ : મૃતક મહિલાના પરિવારજનોની ફરિયાદ હતી કે, સરથાણા જકાતનાકાના રોયલ આર્કેડમાં આવેલ આનંદ સર્જીકલ એન્ડ ઓર્થોપેડિક હોસ્પિટલમાં એપેન્ડિક્સના દર્દીનું ઓપરેશન કરવામાં આવ્યું હતું. એપેન્ડિક્સના ઓપરેશન દરમિયાન નજીકની નસમાં કાણું પડી ગયું હતું. નસમાં કાણું પડી જતા 1.20 લિટર લોહી વહી ગયું હોવાનું સામે આવ્યું હતું. ફરિયાદના આધારે પોલીસે ડો. નિતેષ સાવલીયા સામે 304(એ) મુજબ ગુનો નોંધ્યો હતો. હોસ્પિટલના ડોક્ટર સામે બેદરકારીનો ગુનો સરથાણા પોલીસ મથકમાં નોંધાયો હતો.
પોલીસ કાર્યવાહી : સરથાણાના PI વિરલ પટેલે જણાવ્યું હતું કે, આ ઘટનામાં સરથાણા પોલીસે ઓપરેશન દરમિયાન બેદરકારી દાખવનાર આનંદ હોસ્પિટલના ડો. નિતેષકુમાર પરસોત્તમભાઈ સાવલિયા સામે ગુનો દાખલ કરી વધુ તપાસ હાથ ધરી છે. પરિવારજનોએ આક્ષેપ કર્યો હતો કે, વર્ષ 2022 સમયે પરિવારે ડેડબોડી લઈ જવાનો પણ ઇન્કાર કર્યો હતો. સ્મીમેરમાં મૃતક પ્રિયંકાબેનના મૃતદેહનું પોસ્ટમોર્ટમ કરાયું હતું. જરૂરી સેમ્પલ લઈ એફએસએલમાં ચકાસણી અર્થે મોકલ્યા હતા.
