સરકારી શાળાના આચાર્યની અનોખી પહેલ: બોર્ડના વિદ્યાર્થીઓ માટે મેથ્સ સોલ્યુશનના વીડિયો તૈયાર કર્યા

સુરત: બોર્ડની પરીક્ષાને ગણતરીના દિવસો બાકી છે, ત્યારે ગણિત જેવા વિષયનું પેપર વિદ્યાર્થીઓ સરળતાથી આપી શકે તે માટે સરકારી શાળાના આચાર્યએ બોર્ડની પરીક્ષાના વિદ્યાર્થીઓની ચિંતા દૂર કરવા માટે ગણિતના કુલ 70 વીડિયો બનાવી તેના QR કોડ રીલીઝ કર્યા છે. જેથી વિદ્યાર્થીઓમાં ગણિતની પરીક્ષા માટે જે ભય છે. તે દૂર થાય અને નબળી પરિસ્થિતીના વિદ્યાર્થીઓ વીડિયો પરથી વિનામૂલ્યે માર્ગદર્શન મેળવી શકે.

એક તરફ બોર્ડની પરીક્ષામાં સારા માર્ક્સ લાવવા પ્રાઇવેટ શાળાઓના વિદ્યાર્થીઓ મોંઘા કોચિગ લેતા હોય છે. ત્યારે મસમોટી ફી ન ભરી શકનાર વિદ્યાર્થીઓ માટે સુરત નગર પ્રાથમિક શાળા ક્રમાંક 114 સંત ડોંગરેજી મહારાજ પ્રાથમિક શાળાનાં આચાર્ય નરેશ મહેતાએ આવનારી ધો-10ની ગણિતની પરીક્ષામાં ઉપયોગી થઇ શકે એવા નવી પેપર સ્ટાઇલના દાખલાના સોલ્યુશનના વિડિયો અને તેના QR કોડ તૈયાર કર્યા છે. ગણિતનું પેપર દરેક વિદ્યાર્થી અને વાલીઓ માટે મોટા પડકાર સમાન છે. ગણિત જેવા વિષયનું પેપર વિદ્યાર્થીઓ સરળતાથી આપી શકે તે માટે સરકારી શાળાના આચાર્યએ આ પહેલ કરી છે.

તેમણે "નરેશ મહેતાએડયુ'' ચેનલ પર કુલ 70 વીડિયો અપલોડ કર્યા છે. હાલ ગણિત-વિજ્ઞાનનો અભ્યાસક્રમ બદલાયો છે. જેની ચિંતા વિદ્યાર્થીઓમાં જોવા મળી રહી છે, ત્યારે આ QR કોડના માધ્યમથી વીડિયો જોઈ બોર્ડના વિદ્યાર્થીઓને નવી પેપર સ્ટાઇલ મુજબ દાખલાઓ સમજવામાં આસાન બનશે. જો વિદ્યાર્થીઓ કોઇ ચેનલ કે. વોટ્સએપમાં લિંક ન મેળવી શકે તો કોડ સ્કેન કરીને વીડિયો નિહાળી શકશે.

આચાર્ય નરેશ મહેતા દર વર્ષે કોઇપણ કારણસર અભ્યાસ છોડી દેનાર દીકરીઓને એક્ષ્ટર્નલ પરીક્ષા માટે ફ્રીમાં તૈયારી કરાવે છે. તેમના ગણિત, અંગ્રેજી અને સ્પર્ધાત્મક પરીક્ષાઓનાં વીડિયો અત્યાર સુધીમાં પાંચ લાખથી પણ વધુ વિદ્યાર્થીઓ જોઇ ચુક્યા છે. વિદ્યાર્થીઓના ભવિષ્ય માટે ચિંતાતુર બનેલા નરેશ મહેતાના આ પ્રેરણાદાયી કાર્યને મુખ્યપ્રધાન વિજય રૂપાણીએ પણ બિરદાવેલું છે.