સુરત : ડાયમંડ સિટી સુરતના ડાયમંડ કિંગ સવજીભાઈ ધોળકિયાને લોકો દિલદાર બોસ તરીકે ઓળખે છે. તેઓ દિવાળી બોનસ તરીકે તેમના હીરાના કંપનીમાં કામ કરતા કર્મચારીઓને કાર, મકાન અને ઝવેરાતની ભેટ આપનાર આપતા હોય છે. પરંતુ સવજી ધોળકિયા હાલ તેમના પૌત્રને મજૂર તરીકે કામ કરવા મોકલવા માટે ખુબ જ ચર્ચામાં છે. રુવિન ધોળકિયા રુ. 12,000 કરોડની ડાયમંડ કંપનીના માલિક અને ડાયમંડ કિંગ સવજી ધોળકિયાને પૌત્ર છે. જે અમેરિકાથી માસ્ટર ઓફ બિઝનેસ એડમિનિસ્ટ્રેશનનો અભ્યાસ પૂર્ણ કરી વતન પરત ફર્યો છે. પરંતું તેને એક અનામી અને સામાન્ય માણસનું જીવન જીવવા માટે ચેન્નાઈ મોકલવામાં આવ્યો હતો.
સંઘર્ષની કથા : રુવિન ધોળકિયા દાદાના આદેશથી 30 જૂનના રોજ રુવિન ધોળકિયા સુરતથી ચેન્નાઈ જવા નીકળ્યો હતો. તેને પોતાની ઓળખ જાહેર ન કરવા માટે પણ સૂચના આપવામાં આવી હતી. મોબાઇલ ફોનનો ઉપયોગ કરવાની પણ મનાઈ કરવામાં આવી હતી. જરુરીયાત અને માત્ર ઇમરજન્સી માટે રૂ. 6000 નજીવી રકમ આપવામાં આવી હતી.
સેલ્સમેનની પ્રથમ નોકરી : ચેન્નાઈ પહોંચ્યા પછી રુવિન ધોળકિયાનું પહેલું કામ નોકરી શોધવાનું હતું. જોકે, આ કામ તેના માટે મોટા પડકારોથી ભરેલું હતું. કારણ કે, તેને એક પછી એક ઘણી જગ્યાએ રિજેક્શનનો સામનો કરવો પડ્યો હતો. રુવિનની પહેલી નોકરી ચેન્નાઈ હાઈકોર્ટ મેટ્રો પાસે આવેલી કપડાની દુકાનમાં સેલ્સમેન તરીકેની હતી. અહીં તેણે 9 દિવસ સુધી કામ કર્યું હતું.
મારો ઉદ્દેશ્ય રૂવિનને બિઝનેસ સ્કૂલમાં જે ભણાવવામાં આવ્યું છે, તેનાથી આગળ રિયલ લાઈફ મેનેજમેન્ટ એજ્યુકેશન આપવાનો હતો. જેથી તે ભવિષ્યમાં પોતાની કંપનીમાં કામ કરનાર કર્મચારી કઈ રીતે મહેનત કરે છે તે અંગે જાણી શકે.-- સવજી ધોળકિયા
લાઈફ મેનેજમેન્ટ એજ્યુકેશન : ત્યારબાદ કરોડો રૂપિયાની કંપનીના માલિકના વારસદાર રુવિને 8 દિવસ ભોજનશાળામાં કામ કર્યું હતું. તે વેઈટર તરીકે પ્લેટ સેટિંગ અને સેવા કેવી રીતે કાર્યક્ષમ રીતે મેનેજ કરવી તે શીખ્યો હતો. હોટલની નોકરી છોડી અને 9 દિવસ સુધી ઘડિયાળના આઉટલેટમાં વેચાણનું કામ કર્યું હતું. તેણે ઘડિયાળના સમારકામમાં પણ મદદ કરી છે.
રુ. 200 માં દિવસ કાઢ્યો : રુવિનની છેલ્લી નોકરી બેગ અને લગેજ સ્ટોર પર હતી. જ્યાં તેણે બે દિવસ મજૂરી કામ કર્યું હતું. રુવિને ચાર અલગ-અલગ નોકરી સંભાળી હતી. 80 થી વધુ અસ્વીકારનો પણ સામનો કરવો પડ્યો હતો. રોજના રૂ. 200 ના ખર્ચ ભથ્થા પર જીવવું પડતું હતું. તેઓ ચેન્નાઈમાં સાધારણ વિદ્યાર્થી તરીકે રહેતા હતા. ઘણીવાર માત્ર એક જ સમયે ભોજન લઈ શકતા હતા.
