રાજ્યમાં રેલવે વિભાગમાં ટ્રેન અડફેટે અકસ્માતના બનાવોમાં દિવસે-દિવસે વધારો થઇ રહ્યો છે. હાલ જ બે દિવસ અગાઉ ઉધના રેલવે સ્ટેશનથી કાંકરી ખાડી નજીક કર્ણાવતી એક્સપ્રેસ ટ્રેન અડફેટે આવી જતા રાજસ્થાનના ત્રણ યુવાનોના મોત થયા હતા. આ ઘટના હજી શમી નથી, ત્યાં બીજી ઘટના પ્રકાશમાં આવી છે.
જે ઘટનામાં બે યુવકોના કમકમાટીભર્યા મોત નિપજ્યા છે. રેલવે પોલીસના સૂત્રો પાસેથી મળતી માહિતી અનુસાર, સુરત તરફથી આવતી બાંદ્રા-ઉદયપુર ઇન્ટરસિટી એક્સપ્રેસ ટ્રેન અડફેટે રવિવારના રોજ સાંજના સાડા આઠ વાગ્યાના અરસામાં કમકમાટીભર્યા મોત નિપજ્યા છે. સુરત તરફથી આવતી બાંદ્રા-ઉદયપુર ઇન્ટરસિટી એક્સપ્રેસ ટ્રેન ઉધના કાંકરી ખાડી નજીકથી પસાર થઈ રહી હતી.
જે દરમિયાન અજાણ્યા બે યુવકો રેલવે ટ્રેક ક્રોસ કરી રહ્યા હતા. જ્યાં બંને યુવકોના બાંદ્રા-ઉદયપુર ઇન્ટરસિટી એકપ્રેસ ટ્રેનની અડફેટે આવ્યા હતા. ઘટના બની ત્યાંથી ઉધના રેલવે સ્ટેશન વચ્ચે આશરે 1 કિલોમીટર જેટલું અંતર હતું.
પોલીસે મૃતદેહને ઉધના રેલવે સ્ટેશન લાવી પોસ્ટમોર્ટમ અર્થે સુરત નવી સિવિલ હોસ્પિટલ ખસેડવાની તજવીજ હાથ ધરી હતી. પોલીસે યુવાનની ઓળખ માટે તજવીજ હાથ ધરી છે. છેલ્લા 24 કલાકમાં ઉધના રેલવેની હદમાં રેલ અકસ્માતની બીજી ઘટના સામે આવી છે. જેમાં કુલ 5 લોકોના મોત થયા છે. જે રેલવે વિભાગ માટે ચિંતાનો વિષય બની રહ્યો છે.
