ગોંડલ APMCમાં ઘઉંનો વેપલો, ગરીબોના હકની 2500થી વધુ બોરીઓનું દરરોજ વેચાણ

સૌરાષ્ટ્રના અગ્રીમ ગણાતા ગોંડલ માર્કેટ યાર્ડ (APMC)માં અનેક જણસીઓ વેચાવા આવતી હોય છે; પણ છેલ્લાં કેટલાક સમયથી ગરીબો માટેના સસ્તા અનાજના ઘઉંનો વેપલો થઇ રહ્યો છે. દરરોજ 2500થી વધારે બોરીઓ વેચાતી હોવાના કૌભાંડની જાણ પુરવઠા વિભાગને થતા તંત્ર સ્થળ પર પહોંચ્યું હતું.

રાજકોટઃ લોકડાઉન દરમિયાન કેન્દ્ર સરકાર દ્વારા દેશનો કોઈ નાગરિક ભૂખ્યો ન રહે તે માટે ઘઉંનું વ્યાપક પ્રમાણમાં સસ્તા અનાજની દુકાનો મારફત વિતરણ કરવામાં આવ્યું હતું. પરંતુ કેટલાક સસ્તા અનાજના વેપારીઓએ ગરીબોને ઘઉંનું વિતરણ કર્યું ન હતું અને જથ્થો બારોબર વેંંચી નાખ્યો હતો. છેલ્લા કેટલાક દિવસોથી ગોંડલ માર્કેટ યાર્ડમાં મધ્યપ્રદેશ, મહારાષ્ટ્ર તેમજ ભારતીય ખાદ્ય નિગમના કટ્ટામાં ઘઉં વેંચતા હોવાનું મોટું કૌભાંડ બહાર આવ્યું છે.

ગોંડલ APMCમાં ઘઉંનો વેપલો

ગોંડલ માર્કેટિંગ યાર્ડમાં સસ્તા અનાજના ઘઉં વેચાવા અંગે ચેરમેન તેમજ વાઇસ ચેરમેને જણાવ્યું હતું કે, ગોંડલ ઉપરાંત આસપાસના તાલુકામાંથી વ્યાપક પ્રમાણમાં ઘઉં વેચાવા આવી રહ્યા છે. યાર્ડના રજિસ્ટરમાં ખેડૂતોનું નામ લખાવતા હોવાથી આ જથ્થો વેચવા આવતા રોકી શકાતો નથી. તેમ છતાં સરકારી બારદાનોને લઈ ઘઉંના વેપારીઓ અને પુરવઠા વિભાગના અધિકારીઓ સાથે વાતચીત કરવામાં આવશે. ગોંડલ તેમજ આસપાસના તાલુકાઓમાં ઘણા ફ્લોર મિલ આવેલા છે. જેમના કેટલાક કારખાનેદારો દ્વારા પુરવઠા અધિકારીઓ, સસ્તા અનાજના વેપારીઓ સાથે મિલીભગત કરી ગરીબોના ઘઉંનો લોટ બનાવી વેચી નાખવામાં આવી રહ્યો હોવાની ચર્ચાઓ પણ થઈ રહી છે.

ગોંડલ APMCમાં ઘઉંનો વેપલો

ટેલિફોનિક વાતચીતમાં રાજેશકુમાર આલ ગોંડલ પ્રાંત અધિકારીએ જણાવ્યું હતું કે, સ્થળ તપાસ માટે મામલતદાર ભરતસિંહ ચુડાસમાને મોકલવામાં આવ્યા હતા. જેઓની તપાસમાં માર્કેટિંગ યાર્ડની પવિત્ર નામની પેઢી દ્વારા માત્ર સસ્તા અનાજના ખાલી બારદાન ખરીદ કરવામાં આવ્યા હોવાનું બહાર આવ્યું હતું. તેમજ સસ્તા અનાજના વેપારીઓ દ્વારા માત્ર 8થી 12 રૂપિયામાં બારદાન ખરીદ કરાતું હોય છે, જ્યારે ઓપન માર્કેટમાં આવા બરદાનની કિંમત 50થી 60 રૂપિયા સુધીની હોવાનું જણાવ્યું હતું.