વીરપુરમાં PGVCLના વીજ થાંભલા ધરાશાયી, તંત્રની બેદરકારી આવી સામે

રાજકોટઃ જિલ્લાના વીરપુર જલારામધામની સીમ વિસ્તારમાં ખેતીવાડી કનેકશન માટે નાખવામાં આવેલા વીજ થાંભલાઓમાં ઓછી ઉંડાઇએ થાંભલાઓ નાખીને PGVCLના અધિકારીઓએ ભ્રષ્ટાચાર આચર્યો છે. અથવા કામમાં બેદરકારી કરી હોવાથી સામાન્ય વરસાદમાં પણ ચાર થાંભલા અને એક ટ્રાંસફોર્મર ધરાશાયી થઈ ગયું હતું અને અનેક થાંભલાઓ પડવાની ભીતી સેવાઇ રહી છે. ત્યારે, તંત્ર મોટી હાની થવાની રાહ જોઇ રહ્યું હોય તેમ હજુ કોઈ રીપેરીંગ કર્યુ નથી.

વીરપુર જલારામધામ આમ તો જેતપુર તાલુકાનું એક ગામ છે. પરંતુ, વીજ પાવર બાબતે ગોંડલ સાથે જોડાયેલ હોય કોઈ પણ પ્રકારનો ફોલ્ટ થાય અથવા તો વીજ બીલની ભરપાઇ કરવી હોય તો વીસ કિમી દુર ગોંડલ જ ગામવાસીઓને જવું પડે છે. વીરપુર તેમજ આજુબાજુના ગ્રામ્ય વિસ્તારમાં ખેતીવાડી વીજ કનેકશન માટે PGVCL દ્વારા જે તે ખેડૂતોના ખેતરમાં વીસથી પચીસ દિવસ પૂર્વે જ વીજ થાંભલાઓ નાખેલ છે. પરંતુ આ થાંભલા નાખવામાં મોટો ભ્રષ્ટાચાર થયો છે અથવા તો કામમાં દાંડાઈ કરવામાં આવી છે.

થાંભલાઓ ખેતીની સાવ પોચી જમીનમાં માત્ર દોઢ ફૂટના ખાડોઓ ખોડી દીધા તથા પોચી જમીન હોય તો થોડો ઊંડો ખાડો ખોદી તેમાં કોન્ક્રીટ કરવી પડે પરંતુ, ઉંડો ખાડો કે કોન્ક્રીટ ન કરવાના પરીણામે સામાન્ય વરસાદમાં જ ચાર વીજ થાંભલાઓ અને એક ટ્રાંસફોર્મર ધરાશયી થઈ ગયા હતાં. જેમાં ટ્રાંસફોર્મર તો ખેડૂતોને અવરજવરના માર્ગ પર પડ્યુ હોવાને કારણે ખેડૂતોને પાંચ કિમી ફરીને વીરપુર જવું પડે છે.

નીચે પડેલ ટ્રાંસફોર્મરના વીજ વાયરોમાં પાવર આવે છે કે નહીં તેની પણ જાણ PGVCL ખેડૂતોને નથી કરતું. ખેડૂતોને કોઈ ઇમરજન્સી ફોલ્ટ એટલે કે આવી રીતે વીજ થાંભલાઓ ધરાશયી થઈ ગયા તેની PGVCLને જાણ કરવી હોય તો વીરપુર સ્થિત કચેરીએ રૂબરૂ જવું પડે અને ત્યાં કોઈ સ્ટાફ ક્યારેય હાજર જ ન હોય કચેરીમાં તો રામ રાજ્ય જોવા મળે છે. જેથી જ ફોલ્ટ લખવા માટેનો એક રજીસ્ટર ટેબલ પર રાખેલ છે. જેમાં ફરીયાદીએ જાતે જ ફોલ્ટની વિગત લખીને ચાલ્યું જવાનું હોય છે. આવી સુવિધા PGVCL એ રાખેલ છે.

વીજ થાંભલા અને ટ્રાંસફોર્મર ધરાશયી થઈ ગયાની જાણ ખેડૂતે બે દિવસ પૂર્વે PGVCLના મુખ્ય અધિકારીને કરી દીધી હોવા છતાં પણ હજુ કોઈ રીપેરીંગ કે જોવા માટે પણ ફરક્યું નથી. ચાર થાંભલા અને એક ટી.સી. ધરાશાયી થઈ ગયા ઉપરાંત આગળના બીજા થાંભલાઓ અને ટ્રાંસફોર્મર પણ દોઢ ફૂટ જેટલી જ ઉંડાઈએ જમીનમાં ખોડયા હોય મોટા ભાગના થાંભલાઓ નીચેથી તુટી ગયા અને ઝૂકી ગયા છે અને એક ટી.સી. તો તેમાં લાગેલ વીજ વાયરોને સહારે ઉભું છે.

ગોંડલ ગ્રામ્ય PGVCLને ખેડૂતો છેલ્લા બે વર્ષથી પ્રિમોન્સૂન એક્ટીવી કરવા માટે લેખીત અરજીઓ આપી હોવા કચેરી દ્વારા ખેડૂતોની અરજીઓ આડે આંખ આડા કાન કરતા હોય ત્યારે સવારે પીઠડીયા ગામના ચંદુભાઈ ગરાળા નામના એક ખેડૂત પોતાના ખેતર પર હતા. ત્યારે, વિજપોલમાંથી આવતા વિજપ્રવાહથી તેમને શોક લાગતાં તેમનું ઘટના સ્થળે જ મોત નીપજ્યું હતું .

PGVCL દ્વારા ધરાશાયી થઈ ગયેલ અને ધરાશાયી થવાના કગાર પર રહેલ ટી.સી.અને થાંભલાઓને ખેડૂત દ્વારા ફરિયાદ કરવાને બે દિવસ બાદ પણ રીપેરીંગ ન કરી જાણે કોઈ મોટા અકસ્માત થવાની રાહ જોતું હોય તેવું લાગી રહ્યું છે.