રાજકોટઃ રાજ્યના હવામાન વિભાગે રાજકોટ સહિત સૌરાષ્ટ્રના અલગ અલગ જિલ્લાઓમાં આગામી 2થી 3 દિવસ કમોસમી વરસાદની આગાહી કરી છે. ત્યારે રાજકોટમાં ગઈકાલે પણ મોડી સાંજે શહેરના અલગ અલગ વિસ્તારમાં ધીમી ધારે વરસાદ જોવા મળ્યો હતો. તો આજે બપોર બાદ પણ શહેરના વિવિધ વિસ્તારમાં સાંજે અચાનક કમોસમી વરસાદ ખાબક્યો હતો. બીજી તરફ શહેરના મવડી વિસ્તારમાં કરા સાથે વરસાદ જોવા મળ્યો હતો. આના કારણે જિલ્લાના ખેડૂતો મુશ્કેલીમાં મુકાયા હતા.
આ પણ વાંચોઃ Unseasonal Rain: નવસારીમાં કમોસમી વરસાદના કારણે ખેડૂતોમાં ચિંતા, કેરીના પાકને નુકસાનની વકી
હોળીના આયોજકો મુશ્કેલીમાં મુકાયાઃ શહેરમાં કમોસમી વરસાદ આવવાના કારણે પગલે હોળીના આયોજકો મૂંઝવણમાં મુકાયા હતા. તેમ જ તમામ તૈયારીઓ થઈ ગઈ અને અચાનક કમોસમી વરસાદ આવવાના કારણે હોળી ઉપર તાલપત્રી ઢાંકવાની નોબત આવી હતી. જ્યારે શહેરના કેટલાક વિસ્તારોમાં રોડ રસ્તાઓ પાણી પાણી થઈ ગયા હતા. એવામાં હોળી કઈ રીતના પ્રગટાવી તેને લઈને પણ સવાલો ઊભા થઈ રહ્યા છે. જ્યારે આજે હોળીનો તહેવાર હોવાથી આજે વહેલી સવારથી શહેરના વિવિધ વિસ્તારોમાં હોલિકા દહનની તૈયારીઓ કરાઈ હતી. તો બપોર બાદ અચાનક વરસાદ આવવાની પગલે હોળી આયોજકો ચિંતામાં મુકાયા હતા.
યાર્ડના સત્તાધીશો થયા એલર્ટઃ શહેરમાં બપોર બાદ વાતાવરણમાં એકાએક વાતાવરણમાં પલટો આવ્યો હતો. ત્યારબાદ શહેરના વાવડી, મવડી, 150 ફૂટ રીંગ રોડ, યાજ્ઞિક રોડ તેમ જ કિશાનપરાચોક સહિતના વિસ્તારોમાં ધીમીધારે વરસાદ ખાબક્યો હતો. જ્યારે આ કમોસમી વરસાદને કારણે શહેરીજનો પણ મુશ્કેલીમાં મુકાયા હતા. તો અચાનક વરસાદના કારણે શહેરમાં ઠંડક પણ પ્રસરી હતી. એટલે કે એકસાથે 2 ઋતુનો અનુભવ થયો હતો. બીજી તરફ હવામાન વિભાગની આગાહીના કારણે યાર્ડના સત્તાધીશોએ પણ યાર્ડ ખાતે રહેલો માલ પલળે નહીં તે અંગેની કામગીરી કરી હતી.
આ પણ વાંચોઃ Unseasonal Rains : અમરેલી જિલ્લામાં કમોસમી વરસાદ થતા ખેડૂતોને મોટા પ્રમાણમાં થયું નુકશાન
ગ્રામ્ય વિસ્તારોમાં પણ વરસાદઃ શહેર તેમ જ ગ્રામ્ય વિસ્તારોમાં પણ બપોર બાદ ધીમીધારે વરસાદ જોવા મળ્યો હતો. આના કારણે ખેડૂતોના ઊભા પાકને નુકસાન થવાની ભીતિ છે. આવામાં ખેડૂત આગેવાન દિલીપ સખીયાએ વરસાદને પગલે ખેડૂતોને સહાય આપે તેવી માગણી પણ કરવામાં આવી રહી છે.
