અસામાજિક તત્વો દ્વારા કોલીથડ ગામે સગીરાના અપહરણનો પ્રયાસ, રોષિત ગ્રામજનોએ કર્યો ચક્કાજામ

ગોંડલના કોલીથડ ગામે આવારા તત્વો દ્વારા વારંવાર યુવતીઓની છેડતી કરવાના પ્રયાસો કરવામાં આવે છે. એવામાં શુક્રવારે રાત્રે એક સગીરાનું અપહરણ કરવાનો પ્રયાસ કરતાં ગ્રામજનો એકઠાં થઇ ગયાં હતાં અને પોલીસને જાણ કરાતાં પોલીસે એક શખ્સની ધરપકડ કરી અન્ય ત્રણને ઝડપવા ચક્રો ગતિમાન કર્યાં હતાં.

ગોંડલઃ છેલ્લાં કેટલાક સમયથી ગામમાં આવારા શખ્સોની અવરજવર વધી હોઇ ગામની બહેન દીકરીઓની છેડતી કરી રહ્યાં હતાં. ગત રાત્રિના હદ વટાવી સગીરાના અપહરણનો પ્રયાસ કર્યો હતો. દરમિયાન બૂમાબૂમ થતાં ગ્રામજનો એકઠા થઇ ગયા હતાં અને અપહરણકારોની ચુંગલમાંથી સગીરાને બચાવી હતી. આ દરમિયાન આવારા શખ્સોએ સગીરાના મોઢાના ભાગે ઇજા કરી હોઇ સારવાર માટે તેને ગોંડલ સરકારી દવાખાને ખસેડવામાં આવી હતી. ગ્રામજનોએ ગામના જ ત્રણ શખ્સો અને ગરનાળાના એક શખ્સ વિરુદ્ધ પોલીસ ફરિયાદ નોંધાવવા કાર્યવાહી હાથ ધરી હતી.

અસામાજિક તત્વો દ્વારા કોલીથડ ગામે સગીરાના અપહરણનો પ્રયાસ

અપહરણની ઘટનાને પગલે ગામમાં વ્યાપક રોષ ફાટી નીકળ્યો હતો. ગ્રામજનો અને બહોળી સંખ્યામાં મહિલાઓ રોડ પર આવી ચક્કાજામ કરી દીધો હતો ઘટનાને પગલે તાલુકા પોલીસ દોડી જઇ કાર્યવાહી હાથ ધરી હતી. અપહરણના પ્રયાસને નિષ્ફળ બનાવી ગ્રામજનોએ બે મોટરસાયકલ કબજે કર્યા હતાં તેમ જ એક યુવાન ઝડપાયો હોઇ પોલીસ હવાલે કરાયા બાદ સમગ્ર ઘટનાને પગલે ગોંડલ તાલુકા પોલીસ દ્વારા વધુ તપાસ હાથ ધરવામાં આવી.

અસામાજિક તત્વો દ્વારા કોલીથડ ગામે સગીરાના અપહરણનો પ્રયાસ

વધુમાં DYSPએ જણાવ્યું કે, તાકીદે ત્રણ આરોપીઓની ધરપકડ કરી હતી જ્યારે એક આરોપીને ઝડપી લેવા ચક્રો ગતિમાન કર્યા હતાં. સગીરા પર દુષ્કર્મ થયું છે કે કેમ તે અંગે મેડિકલ ચેકઅપ માટે તેને હોસ્પિટલે ખસેડાઇ હતી. બાદમાં ઘટનાથી રોષે ભરાયેલા ગ્રામજનોએ ચક્કાજામ કર્યો હતો જેથી પૂર્વ ધારાસભ્ય જયરાજસિંહ જાડેજાએ દોડી જઇ ગ્રામજનોને સમજાવતાં ચક્કાજામ દૂર થયો હતો.