પાટણ: તાલુકા પંચાયતમાં બીજા અઢી વર્ષ માટે પ્રમુખ પદ માટે ભાજપના સદસ્ય લલીબેન દેસાઈ અને ઉપપ્રમુખ માટે સોનલબેન ઠાકોરે ઉમેદવારી ફોર્મ ભર્યું હતું. જ્યારે કોંગ્રેસમાંથી ગુલામ રસુલ મોહમ્મદભાઈ સાજીએ પ્રમુખ પદ માટે અને ભરતજી તલાજી ઠાકોરે ઉપપ્રમુખ પદ માટે ફોર્મ ભર્યા હતા. પ્રાંત અધિકારીની ઉપસ્થિતિમાં પાટણ તાલુકા પંચાયતના સભાખંડમાં ચૂંટણી યોજાઈ હતી.
ટાઈ પડતા અટકી: ચૂંટણી પૂર્વે પાટણ તાલુકા પંચાયતમાં ટાઈ પડે તેવી સ્થિતિ જોવાતી હતી. પરંતુ છેલ્લી ઘડીની રાજકીય સોગઠાબાજીમાં કોંગ્રેસના જ એક ઉમેદવાર ગેરહાજર રહેતા અને અપક્ષ ઉમેદવારે ભાજપની તરફેણમાં મતદાન કરતા પ્રમુખ પદે લલીબેન દેસાઈ અને ઉપપ્રમુખ પદે સોનલબેન ઠાકોર વિજય બન્યા હતા. આમ ભાજપ પાટણ તાલુકા પંચાયતની બેઠક જાળવી રાખવામાં સફળ રહી હતી.
'તાલુકા પંચાયત ખાતે આગામી અઢી વર્ષ માટે પ્રમુખ ઉપપ્રમુખની ચૂંટણી માટે મતદાન પ્રક્રિયા પ્રાંત અધિકારીની અધ્યક્ષતામાં યોજવામાં આવી હતી. જેમાં પ્રમુખ અને ઉપપ્રમુખ માટે ફોર્મ ભરેલા બંને પક્ષના ઉમેદવારો માટે મતદાન કરવામાં આવ્યું હતું. ભાજપના લલીબેન દેસાઈ અને સોનલબેન લેબુજી ઠાકોરને 11-11 મતો મળતા ચૂંટણી અધિકારીએ તેઓને વિજેતા જાહેર કર્યા હતા. ચૂંટણી પ્રક્રિયા શાંતિપૂર્ણ માહોલમાં પૂર્ણ થઈ હતી.' - કેતન પ્રજાપતિ, તાલુકા વિકાસ અધિકારી
ભાજપની તરફેણમાં મતદાન: તાલુકા પંચાયતના કુલ 20 સભ્યોમાંથી ભાજપના તમામ સભ્યો 10 અને કોંગ્રેસના 9માંથી 8 સભ્યો અને એક અપક્ષ સભ્ય મળી કુલ 19 સભ્યો હાજર રહ્યા હતા. કોંગ્રેસના ગીતાબેન રબારી ગેરહાજર રહ્યા હતા. હાજર 19 સભ્યોએ મતદાન કરતા ભાજપના બંને ઉમેદવારોને 11 મતો મળ્યા હતા. જ્યારે કોંગ્રેસના બંને ઉમેદવારોને 8 મત મળ્યા હતા. બાલીસણા બેઠકના અપક્ષ ઉમેદવાર રુકસાના બાનું શેખે ભાજપની તરફેણમાં મતદાન કર્યું હતું.
