પાટણમાં આરોગ્ય કર્મચારીઓએ પડતર પ્રશ્નો બાબતે રેલી યોજી

પાટણ: આરોગ્ય કર્મચારીઓની વિવિધ માંગણીઓ સરકાર દ્વારા ન સ્વીકારતા પાટણ જિલ્લાના આરોગ્ય કર્મચારીઓએ રેલી યોજી સરકાર સામે પોતાનો વિરોધ દર્શાવ્યો હતો. ગુજરાત રાજય આરોગ્ય કર્મચારી મહાસંઘના ગાંધીનગરના નેતૃત્વ હેઠળ આરોગ્ય સેવા પંચાયત હેઠળના વિવિધ સંવર્ગ કર્મચારીઓએ પોતાની વિવિધ પડતર માંગણીઓ જેવી કે, પગાર ધોરણ આપવું, ત્રિસ્તરીય માળખાનો અમલ કરવો, ઝીરો કિલોમીટર પીટી આપવું, તાલુકા જિલ્લા કક્ષાએ બઢતી આપવી સહીતના તેર જેટલા મુદ્દાઓને લઇ સરકારમાં અનેકવાર રજૂઆત આરોગ્ય મહાસંઘ દ્વારા કરવામાં આવી હતી. તેમ છતા સરકાર દ્વારા આજ દિન સુધી આરોગ્ય કર્મચારીઓના પડતર પ્રશ્નોનો કોઈ યોગ્ય નિકાલ ન કરાતા આરોગ્ય મહાસંઘ દ્વારા રાજયમાં સરકાર વિરોધ વિવિધ કાર્યક્રમ યોજવામાં આવ્યો છે.

જિલ્લા મથક પાટણ ખાતે આજે આરોગ્યના 500થી વધુ કર્મચારીઓ સિવિલ હોસ્પિટલમાં એકત્ર થયા હતા અને સિવિલ હોસ્પિટલ ખાતેથી રેલી યોજવામાં આવી હતી. જેમ આરોગ્ય ના કર્મચારીઓએ વિવિધ પ્લેકાર્ડ ધારણ કરી સરકાર સામે સૂત્રોચ્ચાર કર્યા હતા.

આ રેલી શહેરના વિવિધ માર્ગો પર થઈ સિંધવાઈ માતાના મંદીર પરીસર ખાતે પહોંચી હતી. જયાં આરોગ્ય કર્મચારી સંઘના આગેવાનોએ આગળની રણનીતિ અંગે માહીતી આપી હતી. આગામી 17 મી ડિસેમ્બરના રોજ તમામ કર્મચારીઓ આરોગ્ય કમિશ્નરને રજૂઆત કરશે.