પાટણ : પાટણ કોલેજ કેમ્પસ જવાના અંડરપાસમાં ભરાઈ રહેતા વરસાદી પાણીની સમસ્યા ના ઉકેલ માટે રેલવે તંત્ર, પાટણ નગરપાલિકા અને વહીવટી તંત્રની એકબીજાને દોષારોપણ અને ખો આપવાની નીતિને કારણે પ્રતિ વર્ષે ચોમાસામાં હજારો વિદ્યાર્થીઓ અને કચેરી કામ અર્થે આવતા અરજદારોની હાલત દયનીય બની છે. છેલ્લા ત્રણ દિવસથી પડી રહેલા સામાન્ય વરસાદમાં પણ આ અંડરપાસ સ્વિમિંગ પૂલ બન્યો છે. અંડર પાસની એક સાઈડે બનાવેલી પગદંડી પર વિદ્યાર્થીઓ જીવના જોખમે દ્વિચક્રી વાહનો લઈને તો કેટલાક પગપાળા ચાલીને અભ્યાસ અર્થે અવરજવર કરે છે. રખે ન કોઈ દુર્ઘટના સર્જાય તો જવાબદાર કોણ?
પાટણના નાગરિકો માટે મુશ્કેલી - પાટણ કાંસા ભીલડી રેલવે લાઈન બ્રોડગેજમાં (Patan Kansa Bhildi Railway Line) રૂપાંતર થતાં રેલવે તંત્ર દ્વારા કોલેજ કેમ્પસ પાસેની ફાટક બંધ કરી રેલ્વે લાઈન પર લોખંડની રેલીંગ નાખી છે. આ માર્ગ પર આવેલા પ્રાંત કચેરી, સીટી સર્વેની કચેરીએ આવતા જતા અધિકારીઓ, અરજદારો અને જાહેર જનતાની અવરજવર માટે લાખો રૂપિયાના ખર્ચે અંડરપાસ બનાવવામાં આવ્યો છે. પરંતુ રેલવે અને વહીવટી તંત્રના એન્જિનિયરો અધિકારીઓની અણ આવડતને કારણે પાણી નિકાલની યોગ્ય વ્યવસ્થા કરવામાં નહીં. પ્રતિવર્ષ ચોમાસામાં સામાન્ય વરસાદમાં સમગ્ર અન્ડર પાસમાં પાણી ભરાઈ જતા આ માર્ગ અવરજવર માટે બંધ થઈ જાય છે. પંપ લગાવી પાણી ઉલેચવામાં આવે છે. પરંતુ રાત્રિના સમયે વરસાદ પડે છે, ત્યારે કોલેજ કેમ્પસમાં આવેલા શાળા કોલેજોમાં અભ્યાસ કરતા 14,000થી વધુ વિદ્યાર્થીઓ સવારના સમયે અભ્યાસ માટે જઈ શકતા નથી.
આ પણ વાંચો : ઉત્તર ગુજરાતના પાટણ પંથકમાં મેઘમહેર, નીચાણવાળા વિસ્તાર પાણીમાં ગરકાવ
કામગીરીનો દોષનો ટોપલો - અમદાવાદ રેલવે મંડળના જન સંપર્ક અધિકારી જીતેન્દ્ર જયંતે જણાવ્યું હતું કે, કોલેજ કેમ્પસનો અંડરપાસ (College Underpass in Patan) સ્થાનિક વહીવટી તંત્રના એન્જિનિયરોને દિશા નિર્દેશ મુજબ રેલવે તંત્ર દ્વારા બનાવવામાં આવ્યો છે. તેઓના આ જવાબથી અંડરપાસની મંજૂરી સમયે સ્થાનિક વહીવટી તંત્રના અધિકારીઓ અને એન્જિનિયરોએ વરસાદી પાણીનો યોગ્ય રીતે નિકાલ થશે કે નહીં તેનો વિચાર નહીં કર્યો હોય? તો સ્થાનિક તંત્ર અંડરપાસની આ કામગીરીનો દોષનો ટોપલો રેલવે તંત્ર ઉપર નાખી રહ્યા છે. પાટણ નગરપાલિકાની હદ વિસ્તારમાં બનેલા આ અંડરપાસ મામલે રેલવેના અધિકારીઓએ વરસાદી પાણી ભરાઈ રહેવા પાછળ પાલિકાની ડ્રેનેજ વ્યવસ્થાને (Patan Municipality) પણ જવાબદાર ફેરવી રહ્યા છે. તેમજ આગામી સમયમાં નગરપાલિકાના સત્તાધીશો સાથે બેઠક કરી 15 પાસમાં ભરાઈ રહેતા વરસાદી પાણીનો કાયમી નિકાલ હાય તેવી વ્યવસ્થા કરવાની હૈયા ધારણા આપી હતી.
આ પણ વાંચો : મોઘજી ચૌધરી પર થયેલા જીવલેણ હુમલા મામલે ક્લેક્ટરને લેખિત રજૂઆત,વિપુલ ચૌધરી લડી લેવાના મુડમાં
સમસ્યા હલ કરવામાં સ્થાનિક નેતાગીરી નિષ્ફળ - છેલ્લા ચાર વર્ષથી સર્જાતી આ સમસ્યા હલ કરવામાં પાટણ ભાજપના સાંસદ અને સ્થાનિક રાજકીય નેતાગીરી સદંતર નિષ્ફળ ગઈ છે. અનેક વખત કરેલી રજૂઆતોને રેલવે તંત્રના અધિકારીઓ દાદ નહીં આપતા પાટણની નબળી નેતાગીરી શહેરીજનોમાં (Trouble Caused by Rain in Patan) ટીકાને પાત્ર બની છે.
