પાટણ: સિદ્ધપુર ખાતે પોલીસે પેટ્રોલિંગ દરમિયાન રિયાઝુદ્દીન અને અકબરમીયાં નામના બે યુવાનોને લોકડાઉનનો ઉલ્લંધન કરવા બદલ પકડીને પોલીસ મથકે લઇ ગયા હતા. જ્યાં પુત્રો પકડાયા હોવાની જાણ પિતા મયુદ્દીનને થતા તેઓ પોલીસ મથકે આવ્યા હતા અને ફરજ પરના PI વી.એન.મહીડા સાથે બોલાચાલી બાદ ગુસ્સામાં PI પર હુમલો કર્યો હતો. હુમલામાં PIને માથાના ભાગે ઈજા થતા તેઓને સારવાર માટે સિદ્ધપુરની સિવિલ હોસ્પિટલમાં ખસેડવામાં આવ્યા હતા.
જ્યાં તબીબોએ તેમની સારવાર કરી હતી. PIને માથાના ભાગે બે ટાંકા આવ્યા હતા. સિદ્ધપુરમાં ફરજ પરના PI પર થયેલા હુમલાને પગલે પાટણ જિલ્લા પોલીસ અધિક્ષક અક્ષયરાજ મકવાણા સિધ્ધપુર દોડી આવ્યા હતા. સિદ્ધપુર પોલીસે હુમલો કરી નાસી છૂટેલા મયુદ્દીન સૈયદ વિરુદ્ધ ગુન્હો નોંધી વધુ તપાસ હાથ ધરી છે.
