વર્ષ ૨૦૦૨ના સાબરમતી ટ્રેન હત્યાકાંડના ગુનામાં ગોધરા સેશન્સ કોર્ટે આરોપીઓને સજા ફટકાર્યા પછી આરોપીઓએ હાઈકોર્ટમાં અપીલ કરી હતી. હાઈકોર્ટે આરોપીઓને આજીવન કેદની સજા કરી હતી. ઈરફાન-પાડા સહિત ચાર આરોપી જામીન મુક્ત છે. તેઓને ચાર અઠવાડિયામાં હાજર થવા તાકીદ કરાઈ હતી, પરંતુ ઈરફાન પાડા તે સમયે પણ કોર્ટ સમક્ષ હાજર થયો ન હતો. અઢી મહિના પછી ઈરફાન પાડા આણંદ પોલીસના હાથે ઝડપાયો હતો. તેને આજીવન કેદની સજા ભોગવવા માટે વડોદરા સેન્ટ્રલ જેલમાં મોકલી આપવામાં આવ્યો હતો.
વડોદરા સેન્ટ્રલ જેલમાં સજા ભોગવતો ગોધરાના રહેવાસી ઈરફાન સીરાજ પાડા 4 ઓક્ટોબરે હાઈકોર્ટના હુકમ હેઠળ 15 દિવસના પેરોલ પર છૂટયો હતો. ઈરફાનને 20મી ઓક્ટોબરે પરત જેલમાં હાજર થવાનું હતું. પરંતુ તે સમયે હાજર ન હતો થયો. જેથી વડોદરા સેન્ટ્રલ જેલના અધિકારી દ્વારા પંચમહાલ જિલ્લા પોલીસ વડાને આ અંગે જાણ કરવામાં આવી હતી. પરંતુ ઈરફાન મળી આવ્યો ન હતો.
ઈરફાન પાડા વિરુદ્ધ પેરોલ જમ્પની ફરિયાદ જેલર સી.જે.ગોહિલે રાવપુરા પોલીસ સ્ટેશનમાં નોંધાવી હતી. જે ફરિયાદ ગોધરા ટ્રાન્સફર કરવામાં આવી છે. ઉલ્લેખનીય છે કે, ઈરફાન પાડા અગાઉ એક વખત પેરોલ પર છૂટયો હતો. પરંતુ તે વખતે ઈરફાન સમયસર જેલમાં પાછો આવ્યો હતો. ત્યાર બાદ બીજી વખત ઈરફાન પાડા પેરોલ પર છૂટ્યો, પરંતુ આ વખતે ગોધરા સાબરમતી ટ્રેન હત્યાકાંડનો આ આરોપી જેલમાં પાછો આવ્યો નથી.
