નવસારી: દમણિયો દારૂ ગુજરાતની હદમાં ઘુસાડવા માટે બુટલેગરો અવનવા પ્રયાસો કરતા હોય છે. કારણકે આ દારૂ થકી તેઓને ધૂમ કમાણી થતી હોય છે. જેને લઈને બુટલેગરો અવારનવાર પોતાનું શેતાની દિમાગ વાપરી ગુજરાતમાં દારૂ ઘુસાડવાના પ્રયત્નો કરતા હોય છે. પોલીસ પણ આવા તત્વોને ડામવા નેશનલ હાઇવે ઉપર પોલીસ નાકાબંધી ગોઠવી આવા તત્વોને દારૂના માલ સહિત ઝડપી લેતી હોય છે. જેને લઈને બુટલેગરોનું મોટું નુકસાન થતું હોય છે. જેથી પોતાનું નુકસાન અટકાવવા ભેજાબાજ બુટલેગરો હાઇવે પરથી માલ પસાર કરવાને બદલે મોંઘીદાટ ગાડીઓમાં દારૂનો માલ ભરી ગ્રામ્ય વિસ્તારોમાંથી પસાર થતા હોય છે. પોલીસથી બચવા માટે તેઓ પૂરપાટે પોતાની કાર હંકારતા હોય છે. જેને લઈને ગ્રામ્ય વિસ્તારના નાના રસ્તાઓ પર આવા શખ્સો અકસ્માત પણ સર્જતા હોય છે.
સ્ટિયરિંગ પરથી કાબુ ગુમાવ્યો: ગતરોજ નવસારી જિલ્લાના ચીખલી તાલુકાના ચિતાલી ગામેથી અકસ્માતનો આવો બનાવ સામે આવ્યો છે. જેમાં હરેશભાઈ હળપતિ પોતાની ઇકો કારગાડીમાં જોગવડ ગામથી ટાંકલ ગામ ખાતે ઘરવખરીનો સામાન લેવા માટે જતા હતા. તે દરમિયાન સામેથી પુરપાટ ઝડપે આવતી ફોર્ચ્યુનર કારના ચાલક જયદીપ સુમનભાઈ પટેલ નાઓ ગફલત ભરી રીતે હંકારતા સ્ટિયરિંગ પરથી કાબુ ગુમાવ્યો હતો. જેને લઇને અકસ્માત સર્જાયો હતો પરંતુ અકસ્માતમાં સદનસીબે કોઈ મોટી જાનહાની થઈ ન હતી. જ્યારે અકસ્માત કરનાર ત્યાંથી ફરાર થઈ ગયો હતો.
કારમાંથી મળી આવ્યો કાર: અકસ્માતને પગલે ગ્રામજનો તાત્કાલિક ઘટના સ્થળે દોડી આવ્યા હતા અને સમગ્ર ઘટનાની જાણ ચીખલી પોલીસને કરવામાં આવી હતી. જેને લઈને ચીખલી પોલીસ પણ તાત્કાલિક ઘટનાસ્થળે પહોંચી હતી અને કારની તપાસ કરતા પોલીસ પણ ચોંકી ઊઠી હતી. કારણ કે આ કારમાંથી દારૂનો 84 હજાર રૂપિયાનો જથ્થો પોલીસને હાથ લાગ્યો હતો. જ્યારે અકસ્માત કરી ફરાર થયેલા કાર ચાલકને પકડવા માટે પોલીસે ચક્રો ગતિમાન કર્યા હતા.
" ઘટનાની જાણ થતા અમે તાત્કાલિક સ્થળ પર પહોંચ્યા હતા. જ્યાં કોઈને અકસ્માતમાં ઈજા થઈ ન હતી. પરંતુ કારની તપાસ કરતા કારમાંથી વિદેશી દારૂની બોટલો 672 નંગ જેની કુલ કિંમત 84 હજાર તથા ફોર્ચ્યુનર કારની કિંમત 6 લાખ મળી કુલ 6 લાખ 84 હજારનો મુદ્દામાલ કબજે લેવામાં આવ્યો છે. જ્યારે અકસ્માત સર્જી ફરાર થયેલા શખ્સને વોન્ટેડ જાહેર કરી તેને પકડવાના ચક્રો ગતિમાન કરવામાં આવ્યા છે." - જે.બી. જાદવ, તપાસ અધિકારી
