જામનગરથી પિતૃકાર્ય કરવા મોરબી આવેલા બે પિતરાઈ ભાઈઓના અકસ્માતમાં મોત

મોરબીના માળિયા ફાટક નજીક સવારના સુમારે ગમખ્વાર અકસ્માત સર્જાયો હતો. જેમાં બાઈકને અજાણ્યા વાહને હડફેટે લેતા અકસ્માતમાં બે યુવાનોના મોત થયા હતા. જામનગરના રહેવાસી બે પિતરાઈ ભાઈઓ પિતૃકાર્ય અર્થે મોરબી આવ્યા હતા. તે દરમિયાન અકસ્માત સર્જાયો હતો. બે યુવાનના મોતથી પરિવારમાં શોકનું મોજું ફરી વળ્યું હતું.

• પિતૃકાર્ય માટે મોરબી આવેલા બે પિતરાઈ ભાઈઓના અકસ્માતમાં મોત
• માળિયા ફાટક ઓવરબ્રિજ પર ગમ્ખવાર અકસ્માત સર્જાયો
• જામનગરથી મોરબી આવેલા યુવાનોને ભેટ્યો કાળ

મોરબી: માળિયા ફાટક પર આવેલ ઓવરબ્રિજ પર અકસ્માત સર્જાયો હતો. જેમાં અજાણ્યા વાહનચાલકે બે બાઈક ચાલકને ઠોકરે લીધા હતા. જે અકસ્માતમાં બાઈકસવાર બંને યુવાનના ઘટનાસ્થળે જ મોત થયા હતા.અકસ્માતને પગલે બી ડીવીઝન પોલીસ ટીમ ઘટના સ્થળ દોડી ગઈ હતી અને મૃતદેહોને પોસ્ટ મોસ્ટમ અર્થે હોસ્પિટલ ખસેડાયા હતા.

પોલીસે અકસ્માત અંગે વધુ તપાસ હાથ ધરી

મૃતક યુવાનો ઋતિક પરેશભાઈ બજાણીયા (ઉ.વ.20) અને હાર્દિક ધીરેન્દ્રભાઈ બજાણીયા (ઉ.વ.19) બંને જામનગરના હાપા રેલ્વે કોલોનીના રહેવાસી હતા.આ બંને પિતરાઈ ભાઈઓ પિતૃકાર્ય અર્થે મોરબી આવ્યા હતા. આજે અજાણ્યો વાહનચાલકે ઠોકરે લીધા હતા. બી ડીવીઝન પોલીસે સમગ્ર બનાવની અંગે અજાણ્યા વાહનચાલક સામે અકસ્માતનો ગુનો નોંધી તજવીજ હાથ ધરી છે.