મોરબીની નવયુગ સ્કૂલના વિદ્યાર્થીઓએ JEE એડવાન્સના રીઝલ્ટમાં રંગ રાખ્યો

વિજ્ઞાન પ્રવાહના વિદ્યાર્થીઓ માટે આઈઆઈટી જેવી કોલેજમાં એડમીશન મેળવવા માટેની JEE એડવાન્સ 2020નું રીઝલ્ટ તાજેતરમાં જાહેર કરાયું છે જેમાં મોરબી નવયુગ સાયન્સ સ્કૂલના વિદ્યાર્થીએ ઈતિહાસ રચી દીધો છે અને અભૂતપૂર્વ સિદ્ધિ હાંસલ કરી છે.

મોરબીઃ જેઇઇ એડવાન્સ રીઝલ્ટમાં સમગ્ર મોરબી જિલ્લાનું નામ રોશન કરનાર નવયુગ સાયન્સ સ્કૂલના વિદ્યાર્થી બેડીયા મીતેષે ઓલ ઇન્ડિયા રેન્ક 4847 પ્રાપ્ત કરી નોંધપાત્ર સિદ્ધી હાંસલ કરી છે. જે રેન્કના આધારે તે દેશની ટોચની આઈઆઈટી કોલેજમાં એડમિશન મેળવી સમગ્ર મોરબી જિલ્લાનું નામ રોશન કરશે.

મોરબીનો વિદ્યાર્થી પહેલીવાર આઈઆઈટીમાં પ્રવેશ મેળવશે

મીતેશની સફળતા સમગ્ર મોરબી જિલ્લા માટે ગૌરવપ્રદ બાબત છે. કારણ કે દરેક વાલીનું આવું સ્વપ્ન હોય છે કે પોતાનો દીકરો કે દીકરી આઈઆઈટી કોલેજમાં અભ્યાસ કરી પરિવારનું નામ રોશન કરે છે.

મોરબીના શિક્ષણ જગતમાં એતિહાસિક સિદ્ધિ એટલા માટે છે કે મોરબીના વિદ્યાર્થીઓએ અગાઉ આઈએએસમાં સફળતા મેળવી છે, મેડિકલ એજ્યુકેશનમાં નવી ઉંચાઈઓ સર કરી છે. પરંતુ મોરબીનો વિદ્યાર્થી ટેકનોલોજી ફિલ્ડમાં આવી ઝળહળતી સફળતા મેળવીને પહેલીવાર દેશની ટોપ 5 આઈઆઈટી કોલેજમાંથી પ્રવેશ મેળવશે.