મોરબીઃ દીકરો દીકરી એક સમાન એ કહેવત આપણે સાંભળી છે. આજની એકવીસમી સદીમાં આવા ભેદભાવો જોવા મળતા નથી. ત્યારે આ કહેવતને ખોટી પાડે તેવો ધ્રુણાસ્પદ કિસ્સો ટંકારા તાલુકાના નેકનામ ગામે જોવા મળ્યો છે. જેમાં નેકનામ નજીક તાજી જન્મેલી બાળકીને ત્યજી દેવાઈ હતી. બનાવની જાણ થતા 108ની ટીમ ઘટના સ્થળે પહોંચી હતી.
ટંકારા તાલુકાના નેકનામ ગામની સીમમાં તાજી જન્મેલી બાળકીને ત્યજી દેવાયેલી હાલતમાં મળી આવી હતી. સ્થાનિકો દ્વારા જાણ કરવામાં આવતા ટંકારા 108ની ટીમ દોડી ગઈ હતી. આ બનાવને પગલે ગ્રામજનો પણ દોડી ગયા હતા અને બાળકીને ત્યજી દેનાર જનેતા વિરુદ્ધ ફિટકારની લાગણી વરસાવી હતી.
હાલ ત્યજી દેવાયેલી બાળકીને સારવાર માટે રાજકોટ ખસેડાઈ છે અને બનાવને પગલે ટંકારા પોલીસ પણ દોડી ગઈ હતી. આ દુર્ભાગ્યપૂર્ણ બનાવની તપાસ ચલાવવામાં આવી રહી છે તેમજ ફૂલ જેવી બાળકીને ત્યજી દેનારને કડક સજા મળે તેવી માગ પણ લોકો કરી રહ્યા છે.
