મહેસાણામાં પીવાના પાણીની અછત, સરકારી અધિકારીઓ પહોંચ્યા ભગવાનના શરણે

મહેસાણા: મહેસાણા જિલ્લાના સતલાસણા તાલુકામાં આવેલા ધરોઈ ડેમ એ વિસ્તારના ખેડૂતો માટે જીવ દોરી સમાન માનવામાં આવે છે. ડેમના પાણી તળિયાઝાટક થઈ જતા આ ડેમ આધારે પાણી પુરવઠા યોજના આધારિત 9 નગરપાલિકા અને 596 ગામડાઓ પર જળ સંકટ તોળાઈ રહ્યું છે. ધરોઈ પાણી પુરવઠા યોજના વિભાગનું માનીએ તો હવે તેમની પાસે માત્ર આગામી ઓગસ્ટ માસ સુધી ચાલે તેટલું જ પીવાના પાણીનો જથ્થો પડ્યો છે ત્યારે સામે વરસાદના કોઈ ચોક્કસ એંધાણ દેખાતા નથી. જેને લઇ ખુદ સરકારી બાબુઓ જ જળ સંકટની સ્થિતિમાંથી ઉગરવા ભગવાનના શરણે બેઠા છે અને વરુણદેવ મહેરબાન થાય તેવી આજીજી કરી રહ્યા છે.

મહેસાણા ધરોઈ પાણી પુરવઠા યોજના વિભાગ દ્વારા ધરોઈ ખાતે આવેલા કાલેશ્વર મહાદેવના મંદિરે શિવ આરાધના અને ભજન કીર્તન કરી રામધૂન બોલાવી હતી. આ પ્રસંગે નગરપાલિકાના પ્રમીખો પાણી પુરવઠાના અધિકારીઓ અને સ્થાનિક ખેડૂતો એ હાજરી આપી વરુણદેવને મહેરબાન થવા આજીજી કરી હતી. જો પાણી પુરવઠા વિભાગની આ રામધૂન ભજન કીર્તનથી વરુણદેવ મહેરબાન થઈ વરસાદ વરસાવે છે તો ઠીક બાકી તો હવે આગામી 20 ઓગસ્ટ બાદ 9 નગરપાલિકાઓ અને 596 ગ્રામપંચાયતો ધરોઇના પીવાના પાણીથી પણ હવે વંચીત બનશે.