બાલાસિનોર: લાયન્સ ક્લબ દ્વારા કોરોનાગ્રસ્ત સગર્ભા મહિલાઓને ફ્રૂટ અને કઠોળનું વિતરણ કરાયું

કોરોના વાઈરસની મહામારીમાં અનેક સગર્ભા મહિલાઓ કોરોના સંક્રમણથી પોઝિટિવ થઇ હતી. આ કોરોનાગ્રસ્ત મહિલાઓની તંદુરસ્તી જળવાઇ રહે તે હેતુસર આ સગર્ભા મહિલાઓને પોષણક્ષમ, પૌષ્ટિક, સમતોલ આહાર મળી રહે તે પણ એટલું જ જરૂરી છે. આરોગ્ય તંત્ર તરફથી તમામ કોરોનાગ્રસ્ત દર્દીઓની સવિશેષ કાળજી રાખીને સારવાર કરવામાં આવી રહી છે. સગર્ભા મહિલાઓની પણ સંનિષ્ઠ કાળજી રાખવામાં આવે છે. સરકારના આ પ્રયાસમાં સમાજની વિવિધ સામાજિક-સેવાભાવી- સ્વૈચ્છિક- ધાર્મિક સંસ્થાઓ પણ તેમનો ઉમદા સહયોગ આપી રહ્યી છે.

મહીસાગર: જિલ્લામાં કોરોનાગ્રસ્ત દર્દીઓને બાલાસિનોર ખાતેની કોવિડ-19 હોસ્પિટલમાં સારવાર આપવામાં આવે છે. આ હોસ્પિટલમાં કોરોનાગ્રસ્ત આઠ સગર્ભા મહિલાઓને સારવાર દરમિયાન સહાયક, પૌષ્ટિક, પોષણક્ષમ, સમતોલ આહાર મળી રહે તે જરૂરી છે.

તે હેતુસર જિલ્લા આરોગ્ય વિભાગના માર્ગદર્શન હેઠળ અને સ્થાનિક આરોગ્ય વિભાગના સહકારથી લાયન્સ કલબ, બાલાસિનોર દ્વારા આ સગર્ભા મહિલાઓને સતત પાંચ દિવસ સુધી કેળાં, ચીકુ, કેરી તથા ફણગાવેલા મગ અને બાફેલા ચણાનું વિતરણ કરી આ સગર્ભા મહિલાઓની તંદુરસ્તી જળવાઈ રહે તેવું ઉમદા કાર્ય કરી માનવીય અભિગમ અપનાવ્યો હતો.