આશ્ચર્યઃ કચ્છમાં ભેંસે સફેદ પાડીને જન્મ આપતા તેને જોવા લોકો ટોળે વળ્યાં

સામાન્ય રીતે ભેંસ કાળા અથવા ભૂરા રંગની હોય છે. આ ઉપરાંત તેમના બચ્ચાં જન્મથી કાળા અથવા ભૂરા જ હોય છે પરંતુ સોમવારે કચ્છ જિલ્લાના મુન્દ્રા તાલુકાના પ્રાગપર ગામમાં એક આશ્ચર્યજનક કિસ્સો સામે આવ્યો છે. જેમાં પશુપાલકની ભેંસે સફેદ રંગની પાડીને જન્મ આપ્યો છે. આ કિસ્સાથી આસપાસના લોકોમાં આશ્ચર્ય ફેલાયું છે.

• કચ્છના એક ગામમાં કાળી ભેંસે સફેદ પાડીને જન્મ આપ્યો
• લોકો કુતૂહલવશ થઈ પશુપાલકના ઘરે પહોંચ્યા
• પશુપાલકનો પરિવાર પણ આશ્ચર્યમાં મૂકાયો

કચ્છ: જિલ્લાના મુન્દ્રા તાલુકાના પ્રાગપર ગામમાં મોટાભાગના લોકો માલધારીઓ છે તથા વારસાગત રીતે પશુપાલનના વ્યવસાય સાથે સંકળાયેલા છે. ગામના જ લીલાધરભાઈ દોહટના ઘરે ભેંસે એક સફેદ પાડીને જન્મ આપ્યો છે. ભેંસે જે પાડીને જન્મ આપ્યો છે તેનો દેખાવ પણ વાછરડી જેવો છે અને તેનો રંગ સફેદ છે.

સફેદ પાડીને જોવા લોકોના ટોળા ઉમટ્યાં

લીલાધરભાઈ દોહટનો પરિવાર પણ પેઢીઓથી પશુપાલનના વ્યવસાય સાથે સંકળાયેલો છે. પરંતુ આવો કિસ્સો ખુદ પશુપાલકો માટે પણ આશ્ચર્યજનક હતો તથા પ્રથમ વાર આવો કિસ્સો બન્યો હોવાનું પણ ચર્ચાયું હતું. લીલાધરભાઈએ પણ પોતાના જીવનમાં પ્રથમવાર કાળી ભેંસે સફેદ પાડીને જન્મ આપ્યો છે તેવું જણાવ્યું હતું. પ્રાગપર ગામમાં પશુપાલક લીલાધરભાઈના ઘરે સફેદ પાડીનો જન્મ થયો હોવાની વાત સોશિયલ મીડિયામાં ખૂબ ઝડપી ફેલાતા કુતૂહલવશ થઈ પાડીને જોવા માટે પશુપાલકના ઘરે લોકોના ટોળા એકઠા થયા હતા.

કચ્છમાં ભેંસે સફેદ પાડીને જન્મ આપતા તેને જોવા લોકો ટોળે વળ્યાં