પહાડી રાજ્યોમાં થયેલી હિમવર્ષાની અસરથી બર્ફિલા પવન ફૂંકાવવાનું શરૂ કરતાં દેશની પશ્ચિમ સરહદે આવેલું કચ્છ ઠંડુંગાર બની ગયું છે. કચ્છના પાટનગર ભૂજમાં 9 ડિગ્રી, ઔઘૌગિક કંડલા સંકુલમાં 9 ડિગ્રી તાપમાન નોંધાયું હતું. શીતલહેરના પગલે જનજીવન ઠૂંઠવાયું છે. ઠંડીના પગલે જનજીવનને સીધી અસર પહોંચી હતી. રોજીંદો નિત્યક્રમ મોડેથી શરૂ થાય છે. લોકોએ ઠંડી ઉડાડવાના હાથવગાં સાધન તરીકે તાપણાનો ઉપયોગ કરી રહયા છે.
સવારે સૂસવાટા મારતા પવને ઠંડીમાં ઓર વધારો કર્યો છે. ઠંડીએ ભરડામાં લીધું હોય તેમ ગામડાની બજારો પણ મોડેથી ખુલે છે. ઝૂંપડા જેવા કાચા મકાનોમાં રહેતા લોકો કે જેમની પાસે પૂરતા ઓઢવાના સાધનો ન હોય તેવા લોકોને ઠંડીએ વધુ અસર પહોંચાડી છે. ઉપરાંત ઠંડીના કારણે શરદી, ખાંસી, માથાનો દુ:ખાવા જેવી બિમારીનું પ્રમાણ વધ્યું છે. ઠંડીની ધાર તીક્ષ્ણ બનતાં લોકોને આખો દિવસ ગરમ વત્રો પહેરી રાખવાની ફરજ પડી છે. રણકાંધીના વિસ્તારમાં ઠંડીની તીવ્રતા વ્યાપક અનુભવાઈ રહી છે.
