કચ્છઃ ભુજના નાયબ પોલીસ વડા જે. એન. પંચાલે જણાવ્યું હતું કે, બાતમીના આધારે ભુજ તાલુકાના માધાપર-ભુજોડી હાઈવે પર આવેલી સુપાર્શ્વનાથ સોસાયટીમાં રહેતો અને કપડાંની દુકાન ચલાવતા અતુલ પ્રાણલાલ વોરા પાસેથી નકલી ચલણી નોટ હોવાની કોન્સ્ટેબલ જયંતી તેજપાલભાઈ મહેશ્વરીને બાતમી મળી હતી. જેના પગલે શનિવારના રોજ પોલીસના કાફલાએ અતુલ વોરાના ઘરે દરોડો પાડ્યો હતો. ઘરમાંથી પોલીસને રૂપિયા 100ના દરની જાંબલી રંગની 37 નકલી નોટ પકડી પાડી હતી.
મળતી માહિતી મુજબ પ્રાથમિક પૂછતાછમાં આરોપી અતુલે આ ચલણી નોટ બજારમાં ફરતી કરવાના ઈરાદે બેંગ્લોરમાં સો-મિલ ચલાવતાં મૂળ નખત્રાણાના વતની કિશોર પટેલ પાસેથી અઠવાડિયા-દસ દિવસ અગાઉ મેળવી હોવાનું કબૂલ્યુ હતું. આ ઉપરાંત અતુલ વોરા બેગ્લોર રહેવાસી કિશોર પાસેથી કુલ 700 નકલી નોટ લાવ્યો હતો. જેમાંથી 412 નોટ ભુજની શરાફ બજારમાં ‘લધા ઉકા ઝાલા’ નામની દુકાનમાં બેસી મોચીકામનો વ્યવસાય કરતો ભાવેશ મૂળશંકર ઝાલા અને અઢીસો નોટ શરાફ બજારમાં ‘સી. પ્રફૂલચંદ્ર એન્ડ કંપની’ નામની પેઢીમાં કાપડનો વેપાર કરતાં સ્નેહલ પ્રફૂલચંદ્ર ઝવેરીને આપી હતી.
પોલીસે અતુલને સાથે રાત્રે ભાવેશ અને સ્નેહલના ઘર પર દરોડા પાડી તેઓને પણ નકલી નોટના જથ્થા પાસેથી ઝડપી પાડ્યાં હતા. ભાવેશે 412 નકલી નોટમાંથી 62 નોટ બજારમાં સર્ક્યુલેટ કરી દીધી હતી. તેની પાસેથી 350 નોટ રિકવર કરાઈ છે. જ્યારે, સ્નેહલ પાસેથી પોલીસે તમામ 250 નકલી નોટ રીકવર કરી છે. પોલીસે કુલ મળીને 70 હજારની 700 નકલી નોટમાંથી 637 નકલી નોટ રિકવર કરી લીધી છે.
પોલીસે બેન્ક અધિકારીઓને આ નોટ બતાવતા પ્રથમ નજરે સ્પષ્ટ થયું કે, તમામ નોટ કલર ઝેરોક્ષ કરાઈ છે. પોલીસે ઉમર્યું હતું કે, આરોપીઓને રિમાન્ડ પર લેવાની કાર્યવાહી હાથ ધરાઈ છે. જેમાં મૂળ નખત્રાણાનો વતની અને વર્ષોથી બેંગ્લોરમાં સ્થાયી થયેલો કિશોર પટેલ કોણ છે. અને કિશોર પટેલ જ નકલી ચલણી નોટ છાપે છે કે તે અન્ય કોઈ પાસેથી મેળવે છે, કિશોર જોડે અતુલનો ભેટો કોણે અને કેવી રીતે કરાવ્યો, વેગેરે સવાલોના કડીઓ મેળવવા આ કારસાના સૂત્રધાર કિશોર પટેલને ઝડપી લેવા પોલીસે ચક્રો ગતિમાન કર્યાં છે.
