કચ્છ: એક સાથે 7 કોરોનાના દર્દી સામે આવતા આરોગ્ય વિભાગ અને વહીવટી તંત્રમાં હડકંપ મચી ગયો છે. ખાસ કરીને રેડ ઝોન મુંબઈથી આવી રહેલા લોકોને કારણે કચ્છમાં ચિંતા છવાઈ છે. અંજારના બુઢારમોરા ગામના પોઝિટિવ યુવાન સાથે બસમાં આવેલી એક મહિલા સહિત પાંચ અને ગાંધીધામ પોલીસે ગાંજાના કેસમાં પકડેલા એક આરોપીનો રિપોર્ટ પોઝિટિવ આવ્યો છે.
આ વિશે જિલ્લા મુખ્ય આરોગ્ય અધિકારી પ્રેમકુમાર કન્નરે માહિતી આપતા જણાવ્યું હતું કે, આ તમામ લોકોના સંપર્કમાં આવેલા લોકોને કવોરેન્ટાઈન કરવાની કામગીરી શરૂ કરી દેવાઈ છે જયારે તમામ દર્દીઓની હાલત સ્થિર છે. દરમિયાન જડસાના યુવાનના સંપર્કમાં આવેલા તેના પત્ની, અન્ય મુંબઈના ચાર યુવાનો, 18 પોલીસ કર્મચારી- અધિકારીઓ, 20 જેટલા આરોગ્ય કર્મચારીઓને કવોરેન્ટાઈન કરવાની કામગીરી કરવામાં આવી રહી છે.
ઉલ્લેખનીય છે કે, રેડ ઝોન મુંબઈથી લાખોની સંખ્યામાં લોકો કચ્છ પોતાના વતન આવી રહ્યા છે. જડસાના યુવાનને પણ તેના ઘરે મુંબઈથી આવેલા ચાર લોકોને કારણે જ ચેપ લાગ્યાનું તંત્રને અનુમાન છે તો બીજી તરફ બુઢારમોરાના છ કેસ પણ મુંબઈ હિસ્ટ્રી છે. જ્યારે અગાઉ મુંદ્રા આવેલા ક્રુ મેમ્બર, ભૂજ આવેલી તબીબ યુવતી પણ મુંબઈની જ ટ્રાવેલ હિસ્ટ્રી ધરાવે છે. ત્યારે કચ્છમાં બહારથી આવતા તમામ લોકોને ફરજિયાત સરકારી કવોરેન્ટાઈન કરવાની દિશામાં કડક કામગીરીની માગ થઈ રહી છે.
