ખેડાઃ જિલ્લાના નડિયાદ તાલુકાની વાલ્લા પ્રાથમિક શાળાના શિક્ષક હિતેશભાઈ બ્રહ્મભટ્ટ દ્વારા શાળાના વર્ગખંડમાં ગાંધી જયંતી નિમિત્તે વિશાળ રંગોળી બનાવવામાં આવી છે. રંગોળીના માધ્યમથી અનોખી રીતે ગાંધી જીને ભાવાંજલિ આપવામાં આવી છે.
દસ કલાકની મહેનત બાદ શાળાના વર્ગખંડમાં 101 ચોરસ મીટરની આ વિશાળ રંગોળી તૈયાર કરવામાં આવી છે. સાથે જ રંગોળીના માધ્યમથી કોરોનાથી બચવાના ઉપાયો પણ સૂચવ્યા છે. જેમાં ગાંધીજીને માસ્ક પહેરેલા દર્શાવાયા છે. સાથે જ આ વિશાળ રંગોળીમાં યોગાસન કરવા, રોગ પ્રતિરોધક ઉકાળો પીવો, વારંવાર હાથ ધોવા, સોશિયલ ડિસ્ટનસ જાળવવું તેમજ આરોગ્ય સેતુ એપનો ઉપયોગ જેવા કોરોનાથી બચવાના ઉપાયો સુચવાયા છે.
મહામારીને કારણે હાલ શાળાઓ તો બંધ છે. પરંતુ ગાંધી જયંતિ નિમિત્તે બનાવેલ આ વિશાળ રંગોળી જોવા બાળકો સહિત ગ્રામજનો શાળાએ આવી રહ્યા છે. રંગોળી નિહાળી ગાંધીજીને યાદ કરી મહામારી સામે લડવાની પ્રેરણા મેળવી રહ્યા છે.
મહત્વનું છે કે રંગોળીમાં ગાંધીજી માસ્ક પહેરેલા જોવા મળી રહ્યા છે. ત્યારે ગાંધીજીએ સત્ય અને અહિંસાના હથિયારથી લડત ચલાવી અંગ્રેજોને દેશ બહાર કર્યા હતા. તેમ માસ્કના હથિયારથી મહામારી કોરોનાને દેશ બહાર કરવાનો સંદેશ રંગોળીના માધ્યમથી આપવામાં આવ્યો છે. માસ્ક પહેરીને ગાંધીજી જાણે કોરોનાને દેશ બહાર કરવાનું દેશવાસીઓને જણાવી રહ્યા છે તેવું લાગી રહ્યું હતું.
