રાજ્યપાલ ઓ.પી.કોહલીજીએ જણાવ્યું કે, ભારતીય સમાજમાં વરિષ્ઠ નાગરિકો મૂલ્યવાન સંપત્તિ છે. વરિષ્ઠ નાગરિકો પોતાના અનુભવોનું યુવા પેઢી સાથે આદાન પ્રદાન કરી આઝાદીના આંદોલનના લક્ષ, આદર્શોથી નવી પેઢીને વાકેફ કરે તે જરૂરી છે. રાજ્યપાલે વરિષ્ઠ નાગરિકોને પૂજ્ય મહાત્મા ગાંધીજીની 150મી જન્મ જયંતિએ પૂ.બાપૂના આદર્શોને ચરિતાર્થ કરવા સમાજ ઉપયોગી રચનાત્મક પ્રવૃત્તિઓ હાથ ધરી સમાજ પ્રત્યેનું પોતાનું ઋણ અદા કરવા અનુરોધ કર્યો હતો.
રાજ્યપાલ ઓ.પી.કોહલીએ સીનીયર સીટીઝન ફોરમ, મહેમદાવાદ દ્વારા ડી.એ.કોલેજ ઓફ એન્જીનીયરીંગ અને ટેકનોલોજી ખાતે યોજાયેલ ‘‘નયા ભારતના નિર્માણમાં વરિષ્ઠ નાગરિકોની ભૂમિકા‘‘ વિષય સેમિનારમાં પોતાના વિચારો વ્યક્ત કર્યા હતા. રાજ્યપાલે શ્રી ગુણવંત પરીખ દ્વારા લિખિત ‘‘પ્રાસંગિક રામાયણ‘‘ પુસ્તકનું વિમોચન કર્યુ હતું. તેમજ દેહદાન કરનાર વરિષ્ઠ નાગરિકોનું બહુમાન કરવામાં આવ્યું હતું.રાજ્યપાલે પર્યાવરણ બચાવવા, જળસંકટ, જળવાયુ પરિવર્તનની સમસ્યાને પહોંચી વળવા વરિષ્ઠ નાગરિકોને સમયદાન દ્વારા સમાજમાં વ્યાપક જન-જાગૃત્તિ ઉભી કરવા જણાવ્યું હતું.
રાજયોગીની બ્રહ્માકુમારી પૂર્ણિમાબહેને આર્શીવચન પાઠવતા જણાવ્યું કે, નયા ભારતના નિર્માણ માટે વડીલોનું વિશેષ યોગદાન રહ્યું છે. ભાવિ પેઢીમાં સંસ્કારોનું સિંચન, ફેશન અને વ્યસનમુક્તિ, તેમજ કુરિવાજોમાંથી સમાજને મુકત કરવા સાથે સ્વચ્છતા અને સ્વસ્થતા માટે વડીલો સમાજને માર્ગદર્શન આપે તે જરૂરી છે. પૂજ્ય બાપૂના સ્વપ્નના ભારતના નિર્માણ માટે તેમના જીવનમૂલ્યો અને આદર્શોને આત્મસાત કરવા અનુરોધ કર્યો હતો.
આ કાર્યક્રમમાં કલેકટર સુધીર પટેલ, જિલ્લા વિકાસ અધિકારી ડી.એન.મોદી, પોલીસ અધિક્ષક દિવ્ય મિશ્ર, નિવાસી અધિક કલેકટરશ્રી રમેશ મેરજા, પ્રાંત અધિકારી વિવેક પટેલ તેમજ વરિષ્ઠ નાગરિકો હાજર રહ્યા હતા.
