કાઉન્સિલિંગના અભાવને કારણે વધી રહ્યાં છે આત્મહત્યાના બનાવો

જૂનાગઢ : સતત તાણની વચ્ચે જીવતા લોકો કાઉન્સિલિંગના અભાવને લઈને આત્મહત્યા કરી રહ્યા છે. આત્મહત્યાના બનાવોને અટકાવવા માટે માત્ર કાઉન્સિલિંગને વધુ સક્ષમ કરવામાં આવે તો આવા કરુણ બનાવોની સંખ્યામાં ઘટાડો લાવવામાં આપણને સફળતા મળશે તેવું જણાવ્યું હતું.

જૂનાગઢ જિલ્લામાં છેલ્લા બે દિવસમાં 6 વ્યક્તિઓએ આત્મહત્યા કરી લેતા સમગ્ર જિલ્લામાં શોકનું મોજું ફરી વળ્યું હતું. તેમજ આત્મહત્યના વધતા જતા બનાવોને લઈને મનોવિજ્ઞાનીકો પણ ચિંતિત જોવા મળી રહ્યાં છે. આત્મહત્યાનું વધતું જતું પ્રમાણ માનવ સમાજ માટે કરુણ ઘટના સમાન માનવામાં આવી રહ્યું છે. જૂનાગઢ જિલ્લામાં સામુહિક આત્મહત્યાના બનાવો સતત વધી રહ્યાં છે.

સામુહિક આત્મહત્યાને લઈને મનોવિજ્ઞાનીકો તેમના તારણો જણાવી રહ્યાં છે. આત્મહત્યાને અટકાવી શકવાની વિશ્વના કોઈ પણ દેશ પાસે ટેક્નોલોજી નથી. પરતું કાઉન્સિલિંગના માધ્યમથી આત્મહત્યાને ઘટાડી શકવામાં સફળતા મળી શકે તેમ છે. દુરભાગ્યવશ આપણી પાસે સારી કક્ષાના કાઉન્સિલિંગ સેન્ટરોની સાથે કાઉન્સિલિંગ કરી શકે તેવા મનોવૈજ્ઞાનિકોની આજે ઘટ છે. જેને કારણે આત્મહત્યાનું પ્રમાણ ખુબજ વધી રહ્યું છે.

આત્મહત્યાની પાછળ ઘણા કારણો જવાબદાર માનવામાં આવે છે. જે પૈકી કેટલાક કરુણ બનાવો જવાબદાર હોવાનું માનવામાં આવી રહ્યું છે. જેમ કે, બદલતા જતા સામાજિક સમીકરણો, પરિવારો સંકુચિત થવાને કારણે વધતી આર્થિક જરૂરિયાત, રોજગારીનો સળગતો પ્રશ્ન, પ્રેમ વિવાહ, દેખાદેખીને લઈને કરવામાં આવતી કેટલીક ગેર વ્યાજબી કે અઘટિત માંગો, ઈચ્છિત સંતાન પ્રાપ્તિ, આવા અનેક કારણો જવાબદાર છે.

જેને લઈને આત્મહત્યાના બનાવોની સંખ્યામાં સતત વધારો થઇ રહ્યો છે. આત્મહત્યા કરનાર કે કરાવનાર કોઇ પણ વ્યક્તિઓને યોગ્ય સમયે જો કાઉન્સિલિંગ કરવામાં આવે તો તેને આત્મહત્યાના માર્ગેથી પરત વાળવામાં ચોક્કસ સફળતા મળી શકે તેમ છે.