વિશ્વકપની રાઉન્ડ-રોબિન લીગ મેચમાં રવિવારે ભારત અને પાકિસ્તાનની ક્રિકેટ ટીમ વચ્ચે જંગ ખેલવા જઈ રહ્યો છે. ત્યારે ક્રિકેટ રસિકો ભારે ઉત્સાહ જોવા મળી રહ્યો છે. સામાન્ય રીતે ક્રિકેટને લઇને લોકોમાં રોમાંચ હોય જ છે, પણ જ્યારે ભારતની સાથે પાકિસ્તાનની મેચ હોય ત્યારે દેશભરમાં અનોખો માહોલ સર્જાય છે. ટી-20 હોય કે વર્લ્ડ કપ ભારત સાથે પાકિસ્તાન ટકરાવવાનું હોય ત્યારે ક્રિકેટ રસિકોમાં અલગ જ પ્રકારનો જોશ જોવા મળે છે.
અત્યાર સુધીની ભારત પાકિસ્તાનની મેચનો રેકોર્ડ જોઈએ તો મોટાભાગે ભારત જ વિજય રહ્યું છે. એટલે આ વખતે પણ ભારત જ જીતશે તેવો વિશ્વાસ ભારતીય ક્રિકેટ પ્રેમીઓમાં જોવા મળી રહ્યો છે. તો બીજી તરફ સટ્ટબજારમાં પણ ક્રિકેટની અસર વર્તાઇ રહી છે. લોકો કરોડોનો સટ્ટો ભારત પાકિસ્તાનની મેચ પર લગાવી રહ્યાં છે.
ઉલ્લેખનીય છે કે, ભારત માટે શિખર ધવનની ઇન્જરી બાદ ટીમમાંથી થયેલી બાદબાકી ચિંતાનો વિષય બની શકે છે. પરંતુ ભારત પાસે પૂરતા પ્રમાણમાં બેન્ચ સ્ટ્રેન્થ ખેલાડીઓ હોવાને કારણે ભારત અને પાકિસ્તાન સામેની અગત્યની મેચમાં ધવનની કમી નહી પડે તેવુ ક્રિકેટ રસિકો માની રહ્યા છે. તો સામે પક્ષે પાકિસ્તાનની ટીમમાં મોટેભાગે બોલેરો ઉપર નિર્ભર થતી જોવા મળી રહી છે.
મહંમદ આમિર સહિતના કેટલાક ખેલાડીઓ પાકિસ્તાનને જીતાડી શકે તેવો દમખમ રાખી રહ્યા છે. પરંતુ ક્રિકેટની મેચ જીતવા માટે બોલિંગ બેટીંગ અને ફિલ્ડિંગ એમ ત્રણેય પાસાનું આયોજન કરવું પડે જેમાં ભારત પાકિસ્તાન કરતાં ઘણું ચડીયાતુ જોવા મળી રહ્યું છે. ત્યારે જો કોઈ ચમત્કાર થાય તો જ આજની મેચ પાકિસ્તાન જીતી શકે છે. બાકી પરંપરા મુજબ વિશ્વકપની આ મેચમાં પણ પાકિસ્તાન સામે ભારતનો જ્વલંત વિજય થશે તેવું ક્રિકેટ રસિકો માની રહ્યા છે.
આમ, આજની મેચને લઇને ભારતભરમાં અનેરો દેશપ્રેમ જોવા મળી રહ્યો છે. જાણે કોઇ તહેવાર હોય તેમ લોકો આજના દિવસની રાહ જોઇ રહ્યા હતા. જેનો અંત આજે બપોર 3 કલાકે આવશે.
