ગીર સોમનાથ: કોરોના વાઇરસે વિશ્વને પોતના ભરડામાં લીધું છે, ત્યારે આપણા દેશમાં વડાપ્રધાન દ્વારા લોકડાઉન આપવામાં આવેલું છે. જેના કારણે રાજ્યભરમાં કામ માટે આવેલ પરપ્રાંતિય શ્રમિકો અને તેમના બાળકોને તંત્ર દ્વારા અલગ અલગ શેલ્ટર હોમમાં રાખવામાં આવેલા હતા. પણ જ્યારે લોકડાઉનની અવધિ વધારાઈ છે ત્યારે આ પરપ્રાંતિય શ્રમિકો અને તેમના પરિવાર પોતાના વતન જવા માટે વિહવળ બન્યા હતા. ત્યારે ગીર સોમનાથ પોલીસ અધિક્ષક રાહુલ ત્રિપાઠી દ્વારા તેમના બાળકોની વિહવળતા દૂર કરવા માટે તેમને નવા કપડાં અને રમકડાઓનું વિતરણ કરવામાં આવ્યું હતું.
આ ઉપરાંત ગીર સોમનાથ ફિશરીસ કોલેજમાં શેલ્ટર હોમમાં રખાયેલ પરપ્રાંતિય પરિવારોને પોલીસ તંત્ર દ્વારા ભોજન અને તમામ બાકીની વ્યવસ્થા કરવામાં આવી છે. તેમને કોઈપણ પ્રકારની અગવડતા ન પડે તેનું ધ્યાન રાખવા માટે અને બાળકોનું મન પરોવાઈ રહે તેના માટે કપડાં અને રમકડાં આપવામાં આવ્યા હતા. બાળકોમાં ઉત્સાહનો સંચાર કરવા માટે પોલીસે ઉમદા કામગીરી કરી હતી.
