રૂપિયા રળવા સ્ટ્રોમ વોટર લાઈનની કામગીરી અણઘડ કરતાં ગટરના પાણી ઘરોમાં ઊભરાશે: કોંગ્રેસ

પાટનગરમાં રૂ.250 કરોડના ખર્ચે આકાર લઈ રહેલી સ્ટ્રોમ વોટર ડ્રેનેજની કામગીરીને નગરજનો માટે જોખમી ગણાવી કોંગ્રેસે આ અંગે ખુલાસો માગ્યો છે. ગટર લાઈનની ચેમ્બરની બાજુમાં જ સ્ટ્રોમ વોટરની લાઈનની ચેમ્બર બનાવવામાં આવી છે. ગટર લાઈનમાં વારંવાર લીકેજ થતા હોય છે, ત્યારે સ્ટ્રોમ વોટરલાઈનના પાણી ગટરના પાણી ભેગા થઈ જવાની અને ઘરમાં ગટરો ઊભરાવાની ભીતિ કોંગ્રેસે વ્યક્ત કરી છે.

ગાંધીનગર: કોંગ્રેસના કોર્પોરેટર હિરલબેન જોશીએ સ્માર્ટ સિટી વિભાગના ચેરમેનને પત્ર પાઠવીને કામગીરી નબળી હોવાનો દાવો કર્યો છે. સ્ટ્રોમ વોટર લાઈનનું કામ કરતી એજન્સી મનમાની કરી રહી છે. ત્યારે સંબંધિત અધિકારીઓ તેની કામગીરી પર દેખરેખ રાખે છે કે, નહીં તે અંગે કોંગ્રેસે ખુલાસો માગ્યો છે. શહેરમાં ઠેર-ઠેર ખાડા ખોદવાનું અને ભૂંગળા નાખવાનું કામ ચાલી રહ્યું છે, પંરતુ સ્માર્ટ સિટીના ચેરમેન કે મેયરે સ્થળની ક્યારેય મુલાકાત લીધી છે કે, કેમ તે અંગે પણ કોંગ્રેસે ખુલાસો માગ્યો છે.

સ્ટ્રોમ વોટરની કામગીરી માટે આડેધડ ખોદકામ કરવામાં આવે છે, પરંતુ લાઈન નાખ્યા પછી માટી નાખીને યોગ્ય પુરાણ કરવામાં આવતું નથી. જેના કારણે મોટા ખાડાં, ગાબડાં પડતા હોય છે. ચોમાસા દરમિયાન અનેક સ્થળે ખાબોચિયાં પણ ભરાય છે. જેના કારણે રોગચાળો ફેલાવાનો અને અકસ્માત સર્જાવાનો ભય છે. જોકે, તંત્ર દ્વારા આ બાબતે પગલાં ભરવામાં આવતા નથી. નગરજનોને હાલાકીમાં મૂકનારી આ કામગીરી માટે કોણ જવાબદાર છે, તેનો જવાબ માગવામાં આવ્યો છે.આ ઉપરાંત રૂ.250 કરોડનું કામ મેળવ્યા બાદ સંબંધિત એજન્સીને મનપાના અધિકારીઓ છાવરતા હોવાની શંકા વ્યક્ત કરીને કોંગ્રેસે આવી નબળી કામગીરી બદલ એજન્સી સામે પગલાં લેવાયા છે કે, કેમ તે અંગે જવાબ માગ્યો છે. સ્ટ્રોમ વોટર લાઈનની ચેમ્બરને ગટર લાઈનની ચેમ્બરની બાજુમાં જ બનાવાઈ છે. તેનું સ્થળ બદલવું જોઈએ. બંને લાઈન અને ચેમ્બર અત્યંત નજીક છે. ગટરલાઈનમાં વારંવાર ભંગાણ પડે છે અને ગટરના પાણી ઘરોમાં ઊભરાય છે. આ સંજોગોમાં ગટરનું દૂષિત પાણી સ્ટ્રોમ વોટરની લાઈનમાં ભળી જાય તો તેના માટે જવાબદાર કોણ તેવો સીધો સવાલ પૂછીને કોંગ્રેસે સાત દિવસમાં ખુલાસો માગ્યો છે.